Gvardiola: «Barselona»dek o‘ynasangiz, stadionlar hech qachon bo‘sh qolmaydi!

«Manchester Siti» klubi bosh murabbiyi Pep Gvardiola Chempionlar ligasi yarim finali doirasida «Barselona» va «Inter» jamoalari o‘rtasidagi o‘yin (3:3) haqida o‘z fikrlarini bildirib o‘tdi. Ispaniyalik mashhur mutaxassis sobiq jamoasi «Barselona»ning o‘yinini alohida maqtab, natijadan qat’i nazar kataloniyaliklar muxlislarning qalbini qozonganini ta’kidladi.

«Agar siz «Barselona» kabi hujumkor va ochiq futbol namoyish qilsangiz, stadionlaringiz hech qachon bo‘shab qolmaydi. O‘yin natijasi qanday bo‘lishi muhim emas, muxlislarning jamoasi bilan qanchalik faxrlanayotganini ko‘rsangiz bas. «Barselona» futbolini yaxshi ko‘radigan odamlar bugun yana bir bor jamoasidan mamnun bo‘ldi», — dedi Gvardiola.

Shu bilan birga, u «Inter» klubini ham e’tibordan chetda qoldirmay, raqibning kuchli tomonlarini ham ta’kidlab o‘tdi. Mutaxassis o‘tgan mavsum Chempionlar ligasi finalida «Manchester Siti» «Inter»ni mag‘lub etganini ham eslab o‘tdi.

«Inter» yana bir marta o‘zining kuchli jamoa ekanligini isbotladi. Bu biz o‘tgan mavsum Chempionlar ligasi finalida yenggan o‘sha baquvvat, jismonan kuchli va ajoyib himoyalanuvchi «Inter». Ular katta bosim ostida ham sovuqqonlik bilan o‘ynay oladi», — deya qo‘shimcha qildi Gvardiola.

Ma’lumki, «Barselona» va «Inter» o‘rtasidagi ilk yarim final bahsi 3:3 hisobida durang bilan tugadi. Endi final yo‘llanmasini qo‘lga kiritish uchun hal qiluvchi uchrashuv 6 maydan 7 mayga o‘tar kechasi Milanning «Juzeppe Meatssa» stadionida bo‘lib o‘tadi. Bu bellashuvda muxlislarni yana bir qiziqarli va shiddatli o‘yin kutib turibdi. “Zamin”ni Telegramʻda oʻqing!