Pep Gvardiola: "Hammasi o‘z qo‘limizda, bizga faqat uchta g‘alaba kerak!"

Angliya Premer-ligasining 35-turidan keyin musobaqa jadvalida 64 ochko bilan uchinchi o‘rinda borayotgan "Manchester Siti" klubi bosh murabbiyi Pep Gvardiola jamoaning mavsumdagi maqsadlari va yevrokuboklar uchun kechayotgan keskin kurash haqida o‘z fikrlarini bildirib o‘tdi.

Ispaniyalik mashhur mutaxassisning ta’kidlashicha, hozirgi vaqtda APLda Chempionlar Ligasi yo‘llanmasi uchun kurash nihoyatda qattiq va murosasiz kechmoqda. Gvardiolaning fikriga ko‘ra, hozirda oltita yoki yettita klub Yevropaning eng nufuzli turnirlariga chiqish imkoniyati uchun o‘zaro raqobat qilmoqda.

«Hozir Chempionlar Ligasiga chiqish uchun 6-7 ta jamoa jiddiy kurash olib bormoqda. Bu kurashni yengib chiqish uchun biz har bir uchrashuvda maksimal darajada harakat qilishimiz va zarur ochkolarni yig‘ib olishimiz kerak. Barchasi o‘z qo‘limizda, bunga shubham yo‘q. Biz faqatgina qolgan uchta bahsda g‘alaba qozongan holda, YECHL yo‘llanmasini naqd qila olamiz», — dedi Gvardiola.

Shu bilan birga, ispaniyalik mutaxassis mavsum oxirida "shaharliklar" ikkinchi o‘rinni egallab, Angliya Kubogini qo‘lga kiritish ehtimolini ham baholashga shoshilmayapti. Uning aytishicha, hozirda uning asosiy e’tibori faqat navbatdagi o‘yinga qaratilgan va mavsum yakuniga oid taxminlarga berilishni xohlamayapti.

«Mavsumni ikkinchi o‘rinda yakunlash va Angliya Kubogini qo‘lga kiritish haqida hozir o‘ylamayapman. Mening barcha diqqatim "Sautgempton"ga qarshi navbatdagi bahsda. So‘nggi kunlarda meni tashvishlantirayotgan yagona narsa shu», — deya ta’kidladi murabbiy.

Eslatib o‘tamiz, "Manchester Siti" jamoasi Angliya Premer-ligasi 36-turida safarda turnir jadvalida so‘nggi o‘rinda borayotgan "Sautgempton" bilan to‘qnash keladi. Ushbu bahs ikki klub uchun ham katta ahamiyatga ega bo‘lib, manchesterliklar uchun Yevropa Chempionlar Ligasi yo‘llanmasini ta’minlashda muhim qadam bo‘lib xizmat qiladi. “Zamin”ni Telegramʻda oʻqing!