«Yuventus»ning yosh yulduzi «Manchester Siti» bilan shartnoma imzolash ostonasida turibdi!

«Manchester Siti» klubi yozgi transferlar mavsumida himoya chizig‘ini mustahkamlashni rejalashtirmoqda. Bosh murabbiy Xosep Gvardiola avvalroq «Yuventus» himoyachisi Andrea Kambyazoni tarkibga qo‘shib olishni maqsad qilgan bo‘lsa-da, muzokaralar natijasiz yakunlangan edi. Ammo ingliz grandi Kambyazoga muqobil sifatida italiyalik yana bir yosh iqtidor sohibini o‘z safiga jalb etish arafasida turibdi.

Sky Sport nashrining ma’lum qilishicha, «shaharliklar» 22 yoshli iste’dodli o‘ng qanot himoyachisi Nikola Savona bilan og‘zaki kelishuvga erishgan. Yaqin kunlarda tomonlar o‘zaro kelishuvni rasmiy ravishda tasdiqlashlari kutilmoqda.

Yosh himoyachi Nikola Savona bu mavsumda «Yuventus» safida mustahkam o‘rin egalladi va barqaror o‘yini bilan ko‘pchilikning diqqat markaziga tushdi. U joriy mavsumda turli musobaqalarda 36 ta uchrashuvda ishtirok etib, 2 ta gol urish va 1 ta golli uzatmani amalga oshirishga muvaffaq bo‘ldi.

Hozirgi vaqtda Transfermarkt portali yosh futbolchining transfer qiymatini taxminan 14 million yevro atrofida baholamoqda. Bu summa «shaharliklar» uchun katta emas, ammo Savonaning kelajakdagi istiqboli va rivojlanish salohiyati jamoa murabbiylari tomonidan yuqori baholanmoqda.

Tahlilchilarning ta’kidlashicha, Savonaning texnikasi, jismoniy holati va yuqori tezligi «Manchester Siti» o‘yin uslubiga mos keladi. Gvardiolaning hujumkor taktikasida yosh futbolchi himoyadagi muammolarni hal qilish bilan birga, hujumga qo‘shilib borishda ham muhim rol o‘ynashi mumkin.

Nikola Savona va «Manchester Siti» o‘rtasidagi shartnoma qancha muddatga tuzilishi hozircha ma’lum qilinmayapti, ammo mutaxassislar bunday yosh va iqtidorli futbolchini tarkibga qo‘shib olish ingliz grandining kelajak rejalariga juda mos kelishini ta’kidlamoqda.

Zamin.uz tahririyati ushbu transferga oid vaziyatni kuzatib boradi va so‘nggi xabarlarni o‘z o‘quvchilariga taqdim etib boradi. “Zamin”ni Telegramʻda oʻqing!