Antonio Konte: «Afsuslanaman — biz bugun ikki ochko yo‘qotishga emas, g‘alabaga munosib edik!»

Italiya chempionatining 36-turidan o‘rin olgan bahsda «Napoli» o‘z maydonida «Jenoa» bilan kuch sinashib, 2:2 hisobidagi durangga rozi bo‘ldi. Hozir neapolliklar A Seriyada yetakchilik qilmoqda, biroq ushbu natija ularning eng yaqin ta’qibchisi «Inter» bilan oradagi farqni 1 ochkoga qisqartirib qo‘ydi. Bu vaziyat chempionlik uchun kurashni yanada keskinlashtirdi.

Uchrashuvdan so‘ng, «Napoli»ning bosh murabbiyi Antonio Konte jamoasining ko‘rsatgan o‘yinidan mamnunligini bildirdi, ammo natijadan noroziligini yashirib o‘tirmadi:

— «Jenoa» darvozamizga faqat ikki marta aniq zarba berdi va ikkalasi ham gol bo‘ldi. Futbol shunday o‘yinki, ba’zida sen raqibingdan ancha kuchliroq o‘ynaysan, ko‘plab vaziyatlar yaratasan, lekin natija ko‘ngildagidek bo‘lmaydi. Biz bugun aynan shunday vaziyatga tushib qoldik va bu meni xafa qiladi. Chunki biz yaratgan imkoniyatlar bilan, albatta, uch ochkoga loyiq edik.

Mavsumning boshida har bir yo‘qotilgan ochko uchun asabiylashardim. Ammo hozir chempionatning hal qiluvchi pallasida ochko yo‘qotish — ikki hissa og‘riqlidir. Juda qattiq xafaman, lekin bu futbol, hammasi ham biz istagandek bo‘lavermaydi. Men o‘z futbolchilarimdan bundan ortiqni talab qilib bo‘lmasligini ham tushunaman, — dedi tajribali mutaxassis.

Antonio Kontening ta’kidlashicha, jamoa butun o‘yin davomida yaqqol ustunlik qilgan. «Napoli» futbolchilari raqib darvozasiga 22 marta zarba berib, shundan 11 tasini aniq nishonga yo‘llagan. Shu bilan birga, ular to‘p nazoratida ham yaqqol ustunlikni qo‘lda ushlab turgan.

— Biz bu ikki ochkoni yo‘qotishga mutlaqo loyiq emasdik. Endi oldingi maqsadimiz o‘zgardi. Avvalroq chempion bo‘lish uchun so‘nggi uch o‘yinda 7 ochko yetarli edi, endi esa 2 uchrashuvda 6 ochko olishimiz kerak. Agar shunday natijaga erishsak, bu baribir ajoyib natija bo‘ladi va mavsum davomida ko‘rsatgan mehnatimiz samarasi bo‘ladi.

Konte so‘zining yakunida muxlislarga va futbolchilarga ham alohida minnatdorchilik bildirdi:

— Oxirgi ikki tur biz uchun tarixiy ahamiyatga ega. Bu mavsum boshida orzu qilish qiyin bo‘lgan maqsaddir. Agar biz bu natijaga erishsak, bu haqiqiy fantastika bo‘ladi. Bizning muxlislarimiz va butun Neapol ahli shunday ajoyib natijalarga munosibdir. Hali ham biz o‘z imkoniyatlarimizning chegarasidan o‘tib, bor kuchimiz bilan kurashayapmiz. Shu sababli yigitlarimga faqat minnatdorchilik bildirishim mumkin.

«Napoli»ning keyingi uchrashuvlari chempionlik uchun hal qiluvchi ahamiyat kasb etadi. Antonio Konte va uning shogirdlari ushbu ikki bellashuvda faqat g‘alaba qozonishni maqsad qilgan. Zamin.uz tahririyati ushbu jamoaning keyingi o‘yinlarida omad va muvaffaqiyatlar tilab qoladi. “Zamin”ni Telegramʻda oʻqing!