Shensni "Barselona"da qoladimi? Uning kelajagi oilaviy muhokamalarda hal bo‘ladi

Ispaniyaning nufuzli klubi “Barselona” va tajribali darvozabon Voysex Shensni o‘rtasidagi hamkorlik yana uzaytirilishi mumkin. 35 yoshli polyak kiperi o‘zi bu haqda to‘g‘ridan to‘g‘ri bayonot berdi va qaror hali qabul qilinmaganini ta’kidladi.

"Menga ikki yillik yangi shartnoma taklif qilishdi, lekin..."

Shensnining aytishicha, u “Barselona”da qolish masalasini hozircha oila a’zolari bilan muhokama qilmoqda:

“Menga hurmat bilan yangi shartnoma borasida qiziqish bildirishdi. Lekin bu faqat menga bog‘liq masala emas. Men barcha muhim qarorlarni oilam bilan birga qabul qilaman. Hozir esa qaysi yo‘l bizning hayotimiz uchun ma’qulroq bo‘lishini anglashga harakat qilyapmiz.”

Darvozabon qo‘shimcha qildi:
“Uydagi aksariyat qarorlarni rafiqam qabul qiladi. Men bundan hech qachon uyalmayman. Futbol borasida o‘zim qaror chiqaraman, ammo bu gal vaziyat boshqacha. Sababi biz aslida faqat bir yilga kelishga qaror qilgan edik — orzumizni amalga oshirib, keyin golf o‘ynab yashash uchun. Endi esa ko‘p narsa o‘zgarib ketdi.”

“Kelgusi haftalarda aniq javob bo‘ladi”

Polsha terma jamoasi posboni qarorni yaqin haftalarda qabul qilishini aytdi:

“Bu yerda qolish yoki ketish haqida hali qat’iy fikr bildirolmayman. Ko‘chish, bolalarning o‘qishi, tashkiliy ishlar kabi omillar bor. Hozir esa shunchaki bu joydagi har bir lahzadan zavq olayapman.”

Shensnining joriy mavsumdagi statistikasi

Tajribali posbon La Ligada 14 ta uchrashuvda ishtirok etdi va ularning 7 tasida o‘z darvozasini sog‘ saqlashga erishdi. Uning ishonchli o‘yini jamoaga bir necha muhim ochkolar keltirdi.

Zamin.uz tahririyati Voysex Shensniga qanday qaror qabul qilmasin — omad va barqarorlik tilab qoladi. Agar u “Barselona”da qolsa, bu jamoaning mustahkam himoyasi uchun katta yutuq bo‘ladi. “Zamin”ni Telegramʻda oʻqing!