«Real» Xabi Alonso uchun «Bayer»ga badal puli to‘lamaydi: bunga sabab nima?

Madridning «Real» klubida yangi bosh murabbiy bo‘lishi kutilayotgan Xabi Alonso borasida yangi va qiziqarli tafsilotlar ma’lum bo‘ldi. Ispaniyalik mashhur mutaxassisning hozirgi ish joyi — Leverkuzenning «Bayer» klubi uning transferi uchun Madridliklardan badal puli talab qilmaslikka qaror qildi.

Futbol olamida odatda shartnoma muddati yakunlanmasidan avval boshqa klubga ko‘chib o‘tadigan o‘yinchi yoki murabbiy uchun ma’lum miqdorda kompensatsiya yoki badal puli to‘lanishi shart qilinadi. Ammo bu holatda «Bayer» rahbariyati klub uchun tarixiy muvaffaqiyatlarni qo‘lga kiritishda muhim rol o‘ynagan murabbiyga hurmat bildirib, uni erkin agent sifatida qo‘yib yuborishni lozim topdi.

Eslatib o‘tamiz, Xabi Alonsoning «Bayer» bilan amaldagi shartnomasi yana bir yil davom etishi kerak edi. Lekin The Telegraph nashrining xabar berishicha, Leverkuzen klubi rahbarlari bu borada istisno qilishga qaror qilib, uni transfer uchun mo‘ljallangan badal pulisiz qo‘yib yuboradigan bo‘lishdi.

Xabi Alonso 2022 yilning yozidan buyon «Bayer» klubida faoliyat yuritib kelmoqda. Ispaniyalik mutaxassis joriy mavsumda jamoani tarixida birinchi marta Germaniya chempioniga aylantirib, o‘z nomini «Bayer» tarixi zarvaraqlariga yozib qo‘ydi.

Jamoa rahbariyati bu muvaffaqiyatni e’tiborga olib, uning yangi bosqichga qadam tashlashiga yo‘l ochib bermoqchi. Shu munosabat bilan «Bayer» 9 may kuni rasman Xabi Alonso mavsum yakunida jamoani tark etishi haqida xabar tarqatgan edi.

Madridda Xabi Alonso «Real»ning yangi loyihasiga boshchilik qilishi kutilmoqda. Shuningdek, «Qirollik klubi» rahbariyati yangi murabbiy uchun tarkibni ham jiddiy yangilash va kuchaytirishni rejalashtirgan.

Zamin.uz tahririyati Xabi Alonsoga yangi jamoasida ham muvaffaqiyat va katta g‘alabalar tilab qoladi! “Zamin”ni Telegramʻda oʻqing!