Ronalduning o‘g‘li ham futbol yulduziga aylanadimi? Yevropa grandlari uni kuzatishmoqda!

Dunyo futbolida afsonalardan biri sifatida tan olingan Krishtianu Ronalduning katta o‘g‘li – Krishtianu Junior otasining izidan borish uchun katta qadam tashladi. 14 yoshli futbolchi yaqinda Xorvatiyada o‘smirlar o‘rtasida o‘tkazilayotgan nufuzli xalqaro turnirda Portugaliya o‘smirlar terma jamoasida o‘zining ilk rasmiy o‘yinini o‘tkazdi.

Yaponiyalik tengdoshlari bilan bo‘lgan bahsda kichik Ronaldu gol yoki assist bilan ko‘zga tashlanmagan bo‘lsa-da, uning o‘yindagi harakatlari va texnik mahorati Yevropaning mashhur klublari skautlarining diqqat markazida bo‘ldi.

Xorvatiyaning Sportske Novosti nashri tarqatgan ma’lumotlarga ko‘ra, Portugaliya o‘smirlar terma jamoasi ishtirokidagi uchrashuvni “Manchester Yunayted”, “Tottenxem”, “Yuventus”, “Inter” va “Atalanta” kabi mashhur klublarning mutaxassislari kuzatib borgan. Shu bilan birga, Germaniya Bundesligasidan o‘nga yaqin klubning seleksiya mutaxassislari ham uchrashuvga tashrif buyurishgan va Ronaldu Juniorning potensialini baholashgan.

Hozirda kichik Krishtianu otasining Saudiya Arabistonidagi “An-Nasr” klubining bolalar jamoasida to‘p surmoqda. U bunga qadar Yevropaning eng yaxshi klublaridan hisoblanadigan “Real Madrid” hamda “Yuventus” akademiyalarida professional tayyorgarlik ko‘rgan edi.

Otasining yuksak nomiga munosib voris bo‘lishga harakat qilayotgan Krishtianu Juniorning kelajagi ko‘plab futbol mutaxassislari tomonidan yuqori baholanmoqda. Uning texnik mahorati, tezligi va harakatlari hozirdanoq Yevropaning kuchli chempionatlari klublarining diqqat markaziga tushgan.

Buguncha kichik Ronalduning terma jamoa tarkibidagi ilk bahsi uning faoliyatidagi yangi va muhim bosqichning boshlanishi bo‘lishi mumkin. Shubhasiz, otasining qo‘llab-quvvatlashi va futbol olamining yuqori e’tibori ostida u professional futbolda katta natijalarga erishishi mumkin.

Zamin.uz tahririyati futbol yulduzining o‘g‘liga professional faoliyatida katta omad tilab qoladi! “Zamin”ni Telegramʻda oʻqing!