Holandning “qora an’ana”si: “Manchester Siti” Angliya kubogini qo‘ldan chiqardi!

Angliya kubogining hal qiluvchi uchrashuvida “Manchester Siti” futbolchilari kutilmaganda mag‘lubiyatga uchrab, mavsumni sovrinsiz yakunladi. “Kristal Pelas” jamoasi 1:0 hisobidagi g‘alaba bilan o‘z tarixida birinchi bor nufuzli sovrinni bosh uzra ko‘tardi va bu tarixiy zafarni katta shodiyona bilan nishonlamoqda.

Finaldagi bu mag‘lubiyatdan keyin statistika mutaxassislari “Siti”ning asosiy to‘purari Erling Xoland bilan bog‘liq qiziq holatga e’tibor qaratdi. Ma’lum bo‘lishicha, norvegiyalik hujumchi klubga kelganidan beri sakkiz marotaba turli musobaqalarning final bahslarida ishtirok etgan bo‘lsa-da, hozircha ushbu muhim o‘yinlarning hech birida raqib darvozasini ishg‘ol qila olmagan yoki jamoadoshlariga golli uzatma amalga oshirmagan.

Kechagi uchrashuvda Xoland maydonda barcha 90 daqiqa harakat qildi, lekin yana bir bor unga omad kulib boqmadi. Eng diqqatga sazovor lahza uchrashuvning ikkinchi bo‘limida kuzatildi: “shaharliklar” darvozasiga penalti belgilandi. Odatda jamoaning asosiy penalti tepuvchisi hisoblangan Xoland bu muhim vaziyatda zarbani amalga oshirishdan bosh tortdi va bu vazifani jamoadoshi Umar Marmushga topshirdi. Biroq misrlik futbolchi bu imkoniyatdan foydalana olmadi — uning zarbasini “Pelas” posboni Din Xenderson mahorat bilan qaytardi.

Shunday qilib, “Siti” uchun bu o‘yin Erling Xolandning final bahslaridagi "qurg‘oqchilik seriyasi"ni davom ettirdi va jamoa mavsumning eng muhim pallasini sovrinsiz yakunlashga majbur bo‘ldi.

Umuman olganda, Xoland bu mavsumda jami 41 uchrashuvda maydonga tushib, raqib darvozalariga 30 ta gol urgan va 4 ta golli uzatmani amalga oshirgan. Ammo hal qiluvchi finallarda u o‘zini ko‘rsata olmayotgani — o‘ziga xos “qora an’ana”ga aylangani kuzatilmoqda.

“Kristal Pelas” esa o‘zining tarixidagi eng yirik va yorqin g‘alabani keng nishonlamoqda. Ular uchun bu zafar klub tarixi uchun oltin harflar bilan yoziladigan voqelik bo‘lib qoladi.

Zamin.uz tahririyati futbol muxlislariga qiziqarli statistika va eng muhim sport xabarlarini yetkazib berishda davom etadi. Xolandning bu noodatiy “qarg‘ishi” qachon tugaydi deb o‘ylaysiz? “Zamin”ni Telegramʻda oʻqing!