«Manchester Siti»da Abduqodir Husanov haqida Gvardioladan muhim bayonot yangradi!

Angliya Premer-ligasining so‘nggi turida "Manchester Siti" o‘z maydonida "Fulxem"ni qabul qilib, shiddatli bellashuvni g‘alaba bilan yakunladi. Ushbu bahsda Ilkay Gyundogan va Erling Xolandning gollari shaharliklarga 2:0 hisobida ishonchli g‘alabani olib keldi.

Uchrashuvdan keyingi matbuot anjumanida jurnalistlar klub bosh murabbiyi Pep Gvardiolaga yarim himoyachi Jek Grilishning tarkibda yo‘qligi haqida savol berishdi. Mutaxassis bu savolga keskin va ochiq javob berib, jamoadagi ichki muhit va o‘z qarorlari haqida batafsil tushuntirish berdi. Shu bilan birga, u ayrim futbolchilar, jumladan hamyurtimiz Abduqodir Husanov haqida ham iliq fikrlarini bildirdi.

"Jek Grilish haqidagi savollaringiz meni hayron qoldiradi. Men qachon undan mamnun emasligim haqida gapirganman?! Bu umuman haqiqatga to‘g‘ri kelmaydi," — deb qat’iy ta’kidladi ispaniyalik murabbiy.

Gvardiola shundan so‘ng jamoada o‘yinchilarning ko‘pligi sababli tanlov qilishda qiyinchiliklar paydo bo‘lishini qayd etib o‘tdi. U klubdagi boshqa futbolchilarga nisbatan ham xuddi Jekka nisbatan qanday munosabatda bo‘lsa, shunday munosabatda ekanligini alohida qayd etdi.

"Masalan, Riko Lyuisni olaylik. U men uchun jamoamdagi eng sevimli futbolchilarimdan biri, lekin u bugun tarkibga kiritilmadi. Jeyms Makayti "Aston Villa" va "Vulverxemptom"ga qarshi o‘yinlarda ajoyib harakat qildi, biroq bugun u qaydnomada yo‘q. Sizlar esa negadir faqat Jek haqida gapirmoqdasizlar. Mening o‘yinchilarim bilan hech qanday shaxsiy muammolarim yo‘q, men ularning barchasiga bir xil munosabatda bo‘laman," — deya tushuntirdi murabbiy.

Ayniqsa, Gvardiolaning o‘z so‘zida Abduqodir Husanovning nomini tilga olishi o‘zbek futbol muxlislari uchun alohida qiziqarli bo‘ldi. "Men uchun Jek Grilish qanday muhim bo‘lsa, Abduqodir Husanov, Vitor Reys, Jeyms Makayti va bugungi o‘yinda qatnashmagan boshqa futbolchilar ham xuddi shunday muhim. Ular haqida ham alohida g‘amxo‘rlik bilan o‘ylayman," — deya qo‘shimcha qildi ispaniyalik tajribali mutaxassis.

Bu bayonot, shubhasiz, Abduqodir uchun katta motivatsiya bo‘lishi mumkin. Yosh o‘zbek futbolchisining nomi dunyoga mashhur "Manchester Siti"ning bosh murabbiyi tomonidan tilga olinishi, uning kelajakdagi salohiyatiga bo‘lgan ishonchdan darak beradi.

Eslatib o‘tish joizki, joriy mavsumni Angliya Premer-ligasidagi o‘yin bilan yakunlagan shaharliklar endi navbatdagi nufuzli musobaqa – klublar o‘rtasidagi Jahon chempionatiga tayyorgarlik ko‘radi. Mazkur musobaqa 15 iyundan 13 iyulga qadar bo‘lib o‘tadi va "Manchester Siti" bu nufuzli musobaqada ham yuqori natija qayd etishni maqsad qilgan.

Shunday qilib, Gvardiolaning mazkur intervyusi jamoa a’zolari o‘rtasidagi birdamlik va bir-biriga bo‘lgan yuksak ishonchdan dalolat berdi. Shu bilan birga, Abduqodir Husanov kabi yosh futbolchilarning katta maydonlardagi muvaffaqiyatlarini ko‘rishni istagan muxlislar uchun bu muhim va quvonarli yangilik bo‘ldi. Zero, bunday darajadagi murabbiyning e’tibori har qanday futbolchi uchun ulkan motivatsiya va kelajakdagi katta yutuqlarga yo‘l ochadi. “Zamin”ni Telegramʻda oʻqing!