“Barselona”da ziddiyat: Yamal va Gavi o‘rtasidagi tortishuv klub kelajagini hal qilishi mumkin

Kataloniyaning sharafli klubi “Barselona”da yosh yulduzlar o‘rtasidagi ichki ziddiyat klub boshqaruvi uchun jiddiy bosh og‘rig‘iga aylanmoqda. Ispaniya matbuoti tarqatgan ma’lumotlarga ko‘ra, 17 yoshli vunderkind Lamin Yamal bilan jamoaning boshqa bir yosh yetakchisi — 20 yoshli Gavi o‘rtasida munosabatlar sovuqlashgan va tortishuv tobora keskinlashib bormoqda.

Ma’lumotlarga ko‘ra, Yamalning asosiy noroziligi — bosh murabbiy Xans-Diter Flikning Gaviga bo‘lgan alohida e’tibori bilan bog‘liq. Yamal o‘zini yetarli darajada qadrlanmayotganini his qilmoqda va Gavining jamoadagi ta’sir doirasi uni ranjitayotgani aytilmoqda.

Ayni paytda, Gavi jamoa ichida katta nufuzga ega. Uning xarakterini va harakatchan o‘yinini jamoadoshlari ham, murabbiylar ham qadrlaydi. Hatto yosh bo‘lishiga qaramay, u ko‘p jihatdan jamoada so‘zga ega futbolchilardan biriga aylangan.

Shu bilan birga, “Barselona” rahbariyati hozirgi vaziyatni diqqat bilan kuzatib bormoqda va agar tanlov qilishga to‘g‘ri kelsa, klub katta ehtimol bilan Lamin Yamalni saqlab qolishni ma’qul ko‘radi. Bu esa Gavining transferi ehtimoli haqidagi mish-mishlarni yanada kuchaytiradi.

Tez orada klub Yamal bilan uzoq muddatli shartnoma imzolash arafasida. Bu esa uning kelajakda “Barsa”ning yuziga aylanishiga ishora sifatida baholanmoqda. Murakkab vaziyat shundan iboratki, klub ichki muhitni buzmasdan, eng samarali yo‘lni tanlashi lozim bo‘ladi.

Bu fonda, Gaviga Yevropa grand klublaridan qiziqish ortib bormoqda. Xususan, “Pari Sen-Jermen” ustida jiddiy ish olib bormoqda va uni qo‘lga kiritish uchun katta transfer mablag‘i taklif qilishga tayyor ekani aytilmoqda. Bu Gavining kelajagi Parijda davom etishi mumkinligini anglatadi.

Futbol olamida yosh iste’dodlar o‘rtasida raqobat tabiiy jarayon hisoblanadi. Ammo bu raqobat klub uchun oqibatsiz tugashi uchun “Barselona” rahbariyati vaziyatni puxta va oqilona boshqarishi talab etiladi. Chunki Yamal ham, Gavi ham — nafaqat klub, balki Ispaniya futboli uchun katta istiqbolga ega bo‘lgan iste’dodlardir. “Zamin”ni Telegramʻda oʻqing!