"Andijon"da o‘zgarishlar: klubdan ketgan legionerlar ketar chog‘ida nima deyishdi?

Joriy mavsumda barqarorlikka erishish oson kechmayotgan “Andijon” klubi FIFA kunlaridan unumli foydalanib, o‘z ustidan ishlashda davom etmoqda. Mavsum davomida turli qiyinchiliklarga duch kelgan “Burgutlar” hozirda Tojikistonning Xo‘jand shahrida o‘quv-mashg‘ulot yig‘inini o‘tkazmoqda.

Maksim Shatskix boshchiligidagi jamoa bu yig‘inda to‘liq tarkibda ishtirok etmayapti. Jamoa safida jarohatlar va ketgan futbolchilar tufayli yetarlicha yo‘qotishlar kuzatildi. Xususan, Oleg Zoteyev, Luka Uskokovich va Farhod Sohibjonov jarohat tufayli yig‘inda qatnashmayapti. Shuningdek, rossiyalik Islam Mashukov va chernogoriyalik Miomir Jurichkovich klubni tark etgani haqida rasman e’lon qilindi.

Tashakkur va xayrlashuv so‘zlari

Ketish arafasida har ikki futbolchi muxlislarga minnatdorlik bildirdi. Islam Mashukov shunday dedi:

“Andijon”ning ishqibozlariga katta rahmat aytmoqchiman. Ular har qanday sharoitda jamoani qo‘llab-quvvatlashadi. Afsuski, ularni xursand eta olmadim, ammo buning sabablari bor edi. Maksim Shatskix kabi mutaxassis bilan jamoa kelajakda albatta yaxshi natijalarga erishadi, deb ishonaman.”

Miomir Jurichkovich esa shunday fikr bildirdi:

“Andijon” men uchun unutilmas joy bo‘lib qoladi. Bu yerda muxlislar juda yuqori darajada. Men yetarlicha foyda keltira olmaganim uchun ketishga qaror qildim. Jamoaga kelajakda omad va muvaffaqiyatlar tilayman.”

Statistik ko‘rsatkichlar va kelajak rejalar

30 yoshli Islam Mashukov jamoaga katta umidlar bilan keltirilgan edi. Biroq u Superliga, Kubok va Superkubokda 13 uchrashuvda qatnashib, faqatgina 2ta golli uzatma bilan cheklandi. Jurichkovich esa jami 10 uchrashuvda maydonga tushdi va himoyada barqaror o‘yin namoyish etganiga qaramay, o‘z salohiyatini to‘liq namoyon qila olmadi.

Endilikda barcha e’tibor yozgi transfer oynasiga qaratiladi. Klubning tarkibni yangilash va ayniqsa, yangi legionerlar bilan mustahkamlash niyati bor. “Andijon” safida katta o‘zgarishlar kutilmoqda.

Biz esa bu jarayonlarni sinchkovlik bilan kuzatishda davom etamiz. Klubning kelgusi qadamlari muxlislar uchun yanada qiziqarli bo‘lishi shubhasiz. “Zamin”ni Telegramʻda oʻqing!