Geynrix: Terma jamoamiz o‘zini namoyon qilishi shart

O‘zbekiston futbol tarixi uchun burilish nuqtasiga aylanishi mumkin bo‘lgan BAAga qarshi hal qiluvchi uchrashuv oldidan muxlislar orasida turli fikrlar va ehtiroslar avjiga chiqmoqda. Ana shunday muhim pallada o‘z vaqtida terma jamoamizning yetakchi hujumchisi, afsonaga aylangan to‘purar — Aleksandr Geynrix o‘z munosabatini bildirdi.

Uning ta’kidlashicha, agar o‘yin davomida hakamlikda noxaq qarorlar bo‘lmasa, O‘zbekiston milliy terma jamoasi bu bellashuvda mag‘lubiyatga uchramaydi.

“Agar hakamlar tomonidan adolatsiz qarorlar bo‘lmasa, biz yutqazmaymiz. Lekin natija qanday bo‘lishidan qat’i nazar, bu xalqning orzusi, intizori va umidini his qilgan holda, maydonda munosib o‘yin ko‘rsatishimiz shart. Boshqa gap qolmadi. Vaqti keldi”, — dedi Geynrix ehtiros bilan.

“Maydonda faqat futbol emas, millat sevgisi bo‘ladi”

Geynrixning fikricha, bu faqat navbatdagi rasmiy uchrashuv emas — bu yillar davomida terma jamoani qo‘llab-quvvatlab kelayotgan yurtdoshlarimiz orzusi amalga oshishi mumkin bo‘lgan sinov pallasi. Shu bois, jamoa har bir daqiqani yurakdan o‘ynashi shart.

Bellashuv soati ma’lum

Ma’lumot uchun, BAA – O‘zbekiston uchrashuvi 5 iyun kuni, Toshkent vaqti bilan 21:00 da start oladi. Ushbu bahsda qayd etiladigan natija O‘zbekiston milliy terma jamoasi uchun jahon chempionati finali sari eshik ochishi mumkin.

Aleksandr Geynrixning so‘zlari nafaqat futbolchilar, balki yurtimizning har bir futbol ixlosmandini ruhlantiradigan fikrdir. Uning “vaqti keldi” degan qat’iy bayonoti ortida yillar davomida to‘p surib, futbol ruhini his qilgan insonning ishonchi va umidi yotibdi.

Endilikda barcha ishonch, duo va qo‘llab-quvvatlash maydondagi “oq bo‘rilar” sari qaratilgan. Vaqti keldi! “Zamin”ni Telegramʻda oʻqing!