Ronalduning jonkuyarligi: «Oyog‘im sinsa ham maydonni tark etmasdim!»

Jahon futboli yulduzi, Portugaliya milliy terma jamoasi hujumchisi Krishtianu Ronaldu Millatlar Ligasi finalida ko‘rsatgan jonkuyarligi va professionalligi bilan yana bir bor muxlislarning qalbini zabt etdi. Ispaniya terma jamoasiga qarshi kechgan dramatik finalda (2:2, penaltilar seriyasida 5:3) Ronaldu nafaqat jamoasi uchun muhim golni urdi, balki o‘yinning hal qiluvchi pallasida og‘ir jarohat olganiga qaramay, oxirigacha kurashib, katta jasorat ko‘rsatdi.

Marca nashriga bergan intervyusida Ronaldu shunday dedi:
«Haqiqatan ham bu jarohat meni ancha avvaldan bezovta qilayotgan edi. Men bu muammoni chigalyozdi paytidayoq his qilgandim va bu og‘riq kuchayib bordi. Lekin bu final edi, Vatanim uchun, jamoam uchun maydonga tushishim kerak edi. Agar kerak bo‘lganda, hatto oyog‘imni sindirishga tayyor edim. Milliy terma jamoa sharafi uchun bor kuchimni ishga soldim va bu safar ham shunday bo‘ldi. Gol urdim, jamoamga yordam berdim, shundan keyin bor imkoniyatimni ishlatib, oxirigacha o‘ynadim».

O‘yinning 88-daqiqasida esa Ronalduning jarohati yanada og‘irlashdi va u zaxiraga olishga majbur bo‘ldi. Ammo shu paytgacha portugaliyalik yulduz o‘zining yuksak professionalligi va jamoadoshlari oldidagi mas’uliyatini yana bir bor isbotladi. Mazkur vaziyat butun stadionda yig‘ilgan muxlislar tomonidan tik turib olqishlandi.

Shu bilan birga, terma jamoaning bosh murabbiyi ham o‘z intervyusida Ronalduning bu xatti-harakatiga alohida urg‘u berdi: «Ronaldu haqiqiy yetakchi ekanligini yana bir marta ko‘rsatdi. U hech qanday jarohatga qaramay, maydondagi har bir daqiqani Vatani uchun o‘tkazadigan ajoyib professional. Bu bizning yosh futbolchilarimiz uchun katta ibrat namunasi bo‘lishi kerak», – dedi murabbiy.

Ronalduning kelajakdagi rejalari haqida savolga javob berar ekan, futbolchi hozircha bu haqda fikr yuritmayotganini ta’kidladi: «Men hozirgi holatimga va jarohatimni tiklashga diqqat qaratishim kerak. Terma jamoa uchun har doim oxirigacha kurashganman va shunday bo‘lib qoladi. Hozir esa qisqa muddatdagi rejalarimni o‘ylayapman. Barcha narsa asta-sekin hal bo‘ladi, muhim narsa sog‘ligimni tiklashdir».

Aytish mumkinki, Krishtianu Ronaldu bu g‘alaba bilan o‘zining milliy terma jamoa safidagi tarixida yana bir yorqin sahifa ochdi. Uning jarohatlangan holda ham maydonga chiqib, o‘zini ayamasdan jang qilgani ko‘plab yosh futbolchilarga o‘rnak bo‘ladigan xatti-harakatdir. Uning bu kabi jasorati va professionalligi ham muxlislar, ham futbol jamoatchiligi tomonidan yuqori baholanib, ijtimoiy tarmoqlarda keng muhokamalarga sabab bo‘lmoqda.

Hozircha futbolchi jarohatidan tiklanish davrini boshlashi kerak bo‘ladi. Ammo muxlislar uni yana maydonda porlashini sabrsizlik bilan kutmoqda. Ronaldu esa o‘z navbatida maydonga qaytish uchun bor kuchini sarflaydi va uning bu qaytishi yanada yorqin bo‘lishiga shubha yo‘q. “Zamin”ni Telegramʻda oʻqing!