"Manchester Siti" Jek Grilish bilan xayrlashishga qaror qildi

Yevropa futbolida yana bir sensatsion xabar! Angliyaning mashhur klubi “Manchester Siti” jamoasi o‘zining yarim himoyachisi Jek Grilish bilan xayrlashishga tayyorgarlik ko‘rayotganini ma’lum qildi. “Shaharliklar” 29 yoshli britaniyalik futbolchini sotish orqali taxminan 50 million funt sterling mablag‘ ishlab olish niyatida.

Ma’lumotlarga ko‘ra, hozircha Grilish uchun birorta klubdan rasmiy taklif tushmagan, biroq unga ijara asosida boshqa jamoaga o‘tish imkoniyati ham ko‘rib chiqilmoqda. Ilgariroq unga “Napoli”, “Everton” va Germaniyaning “Bayer” klublari tomonidan qiziqish bo‘lgani haqida xabarlar tarqalgandi. Ammo hozirda bu variantlar faqatgina mish-mishlar sathida qolmoqda.

Qiziqarli jihati, “Manchester Siti” Grilishni 15 iyunda AQSHda start oladigan klublar o‘rtasidagi Jahon chempionatiga qaydnomaga kiritmadi. Bu esa, futbolchining jamoa safini tark etishi yaqinligidan darak beradi.

Jek Grilish o‘tgan mavsumda “shaharliklar” safida 32 ta o‘yinda maydonga tushib, 3 ta gol urdi va 5 ta golli pas muallifi bo‘ldi. Uning klub bilan amalga oshirgan shartnomasi 2027 yil yozigacha davom etadi, ammo bu kelishuv kutilmagan ravishda muddatidan avval bekor qilinishi mumkin.

Grilishning taqdiri ko‘plab muxlislar va ekspertlar diqqat markazida. Uning yuqori mahorat va ijodkorlik qobiliyati Yevropaning ko‘plab klublarini o‘ziga jalb qilib kelgan. Ammo “Manchester Siti”dagi so‘nggi mavsumda u asosiy tarkibda doimiy o‘ynamagani, uning jamoadagi mavqeini pasaytirgani ehtimoldan holi emas.

Futbolchi uchun yangi chorlov va yangi muhit kerak bo‘lib qolgan ko‘rinadi. Agar Jek Grilish yangi jamoaga o‘tsa, uning professional faoliyatida yangi sahifa ochiladi va bu o‘z navbatida uning yangi iqtidorini namoyon etadi.

Zamin.uz muxlislari uchun eng so‘nggi va qiziqarli futbol yangiliklarini taqdim etishda davom etadi! “Zamin”ni Telegramʻda oʻqing!