Krishtianu Ronaldu: Davr ramzi, mehnat timsoli va futbol afsonasi

Portugaliya Millatlar Ligasida yana g‘alaba qozondi va bu muvaffaqiyatning markazida yana Krishtianu Ronaldu turibdi. Yevropa uni yana ta’riflamoqda, millionlab muxlislar u uchun ko‘z yosh to‘kmoqda, ijtimoiy tarmoqlar esa uning har bir harakatini muhokama qilmoqda. Sababi aniq: XXI asr futbolining eng yorqin timsollaridan biri — aynan u.

Ronaldu, shubhasiz, futbol olamining fenomeniga aylangan. U — boshqalardan butunlay farq qiladigan inson. Messi bilan qiyoslashlar hamisha davom etadi: Messi — tabiiy iste’dod va o‘ziga xos noziklik ramzi bo‘lsa, Ronaldu — tinimsiz mehnat, intilish va ruhiy matonat orqali qirra topgan sportchidir.

Leo Messi “Barselona”dagi ajoyib tizimda o‘sdi, u klub falsafasi va o‘zining tug‘ma dahosi bilan muvaffaqiyat qozondi. Ronaldu esa butun faoliyati davomida o‘zi uchun imkoniyat yaratdi, sinov va to‘siqlarni mehnat, sabr va o‘zgarishga tayyorlik bilan yengdi.

Uning sport zalida qoldirgan yillari uning kuchli gavdasini yaratdi. Minglab takrorlangan zarbalar — aniqligu o‘tkirlikning asosi. Ingliz stadionlaridagi tanqid va bosimlar esa Ronalduning ruhiy baquvvatligini mustahkamladi.

Bugun Ronalduning sovrinlar va yutuqlar ro‘yxati fantastik ko‘rinishga ega:

- 5 marta “Oltin to‘p” sohibi.
- 5 marta Chempionlar Ligasi g‘olibi.
- Yevropa chempioni (2016, Portugaliya bilan).
- 2 marta Millatlar Ligasi g‘olibi.
- Terma jamoalar tarixidagi eng yaxshi to‘purar.
- Chempionlar Ligasida eng ko‘p gol urgan futbolchi.
- Jahon futboli tarixida eng ko‘p gol urgan o‘yinchi — 940+ gol.

Bu ro‘yxatni yana davom ettirish mumkin, ammo eng katta ahamiyat — Ronaldu barcha asosiy yutuqlarini bundan oldin favorit deb atalmagan Portugaliya bilan qo‘lga kiritdi. Bu uning kuchi, ruhi va ilhomini yanada alohida qiladi.

Ronaldu nima uchun futbol ramziga aylandi?

U doim e’tibor markazida — uni muhokama qilishadi, bahslashishadi, tanqid qiladilar yoki ibodat qilib sevishadi. Futbol ramzi bo‘lish — sen maydonda bo‘lmasang ham sen haqingda gapirishlarini anglatadi.

Messi — futbolning eng toza qiyofasi bo‘lishi mumkin. Lekin Ronaldu butun bir davr, futbolning yangi taraqqiyot ramziga aylangan. Va bu davr hali ham tugagani yo‘q: u 2026 yil Jahon chempionati saralash bahslarida 40 yoshida ham maydonda harakat qila oladi.

Krishtianu Ronaldu — bu mehnat, intilish, matonat va futbol tarixidagi eng buyuk afsonalardan biri. Uning ilhomi kelgusi avlod uchun ham so‘nmas manba bo‘lib qolaveradi. “Zamin”ni Telegramʻda oʻqing!