Qozog‘iston deputati: “O‘z muvaffaqiyatimiz uchun o‘zimiz javobgarmiz”

Qo‘shni O‘zbekistonning futboldagi so‘nggi yutug‘i — milliy terma jamoaning Jahon chempionati final bosqichiga yo‘l olishi nafaqat o‘zbekistonliklar, balki butun mintaqa aholisi uchun katta voqea bo‘ldi. Bu muvaffaqiyat Qozog‘iston jamoatchiligida ham katta qiziqish uyg‘otdi. Ayrimlar o‘zbeklar yutug‘i fonida “nega biz emas?” degan savolni ko‘targan bo‘lsa, boshqalar bu holatdan ilhom olib, o‘z futboliga tanqidiy nazar tashlashga chaqirmoqda.

Shu munosabat bilan Qozog‘iston parlamenti deputati, “Respublika” partiyasi rahbari Aydarbek Xo‘janazarov Sports24.kz nashriga bergan intervyusida muhim fikrlar bildirdi. Uning so‘zlariga ko‘ra, Qozog‘iston o‘z kamchiliklari bilan yuzma-yuz kelishi, boshqalarning muvaffaqiyatiga qarab o‘ziga baholar bermasligi lozim.

— Ko‘pincha “O‘zbekiston chiqdi, nega biz hali ham bunday natijaga erisha olmayapmiz?”, degan savolni eshitaman. Lekin bu noto‘g‘ri yondashuv. Biz o‘z yo‘limizda ishlashimiz, ichki tizimdagi kamchiliklar ustida jiddiy ish olib borishimiz kerak. Har bir millat, har bir jamoa o‘z individual yo‘liga ega, — dedi Xo‘janazarov.

Uning ta’kidlashicha, ba’zan muvaffaqiyat aholi soni yoki geografik imkoniyatlar bilan bog‘liq emas. U Islandiya misolida buni ochiq ko‘rsatdi:

— Islandiyada bor-yo‘g‘i 500 ming odam yashaydi. Bizda esa bitta viloyatda ham shuncha aholi bor. Ular Yevropa chempionatida ishtirok etgan, biz esa haligacha kutyapmiz. Bunday misollar bizni ruhan emas, amaliy harakatlarga undashi kerak. Bizda iqlim yaxshi, infratuzilma yaxshi, lekin natija yo‘q. Demak, tizimda muammo bor, — dedi deputat.

Aytish joiz, bu fikrlar Qozog‘iston futbol olamida muhim bahslarga turtki bo‘lmoqda. Mutaxassislar bu holatdan to‘g‘ri xulosa chiqarish, tizimli islohotlar va yoshlar futboliga jiddiy e’tibor qaratish vaqti kelganini ta’kidlashmoqda.

Qolaversa, Qozog‘iston prezidenti Qosim-Jo‘mart To‘qayev ham “Markaziy Osiyo — Xitoy” sammiti doirasida O‘zbekiston prezidenti Shavkat Mirziyoyevni rasman tabriklagan edi. Bu mintaqaviy sport yutuqlari umumiy iftixor manbaiga aylanayotganidan dalolat.

O‘zbekiston milliy terma jamoasining Jahon chempionatiga chiqqani Qozog‘iston uchun ham ruhiy rag‘bat bo‘lishi mumkin. Ammo bu muvaffaqiyatni ko‘zlayotganlar, avvalo, ichki tizim, trenerlar salohiyati, yoshlar siyosati, infratuzilma va akademiyalar ishlarini qayta ko‘rib chiqishlari zarur. Faqat shundagina o‘z yo‘lini topgan, muvaffaqiyatga intiluvchi Qozog‘iston futboli shakllanadi.

Ayni paytda esa futbol muxlislari qo‘shni yurtning yutug‘ini tabriklab, “bizda ham shunday kunlar kelsin” deya umid bilan to‘lmoqda. “Zamin”ni Telegramʻda oʻqing!