Eldor Shomurodov Turkiyaga ko‘chadi: “Istanbul”dan uch yillik taklif

O‘zbekiston milliy terma jamoasi sardori va "Roma" klubi hujumchisi Eldor Shomurodov faoliyatini Turkiya chempionatida davom ettirishi mumkin. Turk matbuoti va xalqaro futbol jurnalistlari tarqatgan so‘nggi xabarlarga ko‘ra, Turkiyaning nufuzli klubi — "Istanbul Bashakshehir" futbolchi bilan aloqaga chiqqan va unga 3 yillik shartnoma taklif etgan.

Ma’lumotlarga qaraganda, "Roma"da yangi mavsumdan boshlab bosh murabbiylik vazifasini bajarayotgan Jan Pero Gasperini o‘z rejalarida Shomurodovni ko‘rmayapti. Ilgari futbolchi bilan 2027 yilgacha shartnomani uzaytirish borasida muzokaralar olib borilgan, hatto Eldor Rimda qolish niyatida maoshini qisqartirishga ham rozi bo‘lgan. Biroq murabbiylar shtabi uning imkoniyatlaridan to‘liq foydalanish niyatida emas.

Eldor Shomurodov 2021 yil yozida "Jenoa" klubidan "Roma"ga ko‘chib o‘tgan edi. Ammo so‘nggi mavsumlarda u asosiy tarkibdan mustahkam joy ola olmadi va "Spetsiya" hamda "Kalyari" klublariga ijara asosida yo‘l oldi. 2024/25 mavsumida u umumiy 37 o‘yinda ishtirok etdi va 7 ta gol hamda 5 ta assist qayd etdi. Bu natijalar uning hali ham yuqori saviyada o‘ynay olishini ko‘rsatmoqda.

Ayni paytda "Roma" safida Ukraina terma jamoasi hujumchisi Artem Dovbik ham bor. Jamoa A Seriyada 5-o‘rinni egallab, Yevropa ligasining asosiy bosqichiga yo‘l oldi. Klub rahbariyati hujum chizig‘ida raqobatni oshirishni maqsad qilmoqda va Shomurodovning ketishiga tayyorgarlik ko‘rilmoqda.

Shu bilan birga, Eldorga qiziqish bildirgan "Istanbul Bashakshehir" ham Turkiya Superligasida 5-o‘rinni egallab, Konferensiyalar ligasining saralash bosqichida ishtirok etadi. Turkiyaliklar terma jamoamiz sardoriga e’tibor qaratayotgani, ularning yuqori darajadagi maqsadlarini ko‘rsatadi.

Ma’lumki, Turkiya Superligasidagi o‘yin sur’ati va raqobat darajasi Yevropa chempionatlariga yaqin. Bu ligada muntazam o‘ynash Eldorning terma jamoadagi formasiga ijobiy ta’sir ko‘rsatishi mumkin. Shuningdek, u uchun yangi mamlakat, yangi muhit va yangi chaqiriq – faoliyatidagi navbatdagi sinovga aylanishi mumkin.

Hozircha rasmiy kelishuv haqida xabar berilmagan, ammo yaqin kunlarda transferning rasman e’lon qilinishi kutilmoqda. O‘zbekistonlik muxlislar uchun esa, sevimli hujumchining yangi bosqichda qanday faoliyat olib borishi katta qiziqish uyg‘otmoqda.

Eldor uchun bu faqat yangi sahifa emas, balki terma jamoa yetakchisi sifatidagi maqomini yanada mustahkamlash imkoniyati ham bo‘ladi. “Zamin”ni Telegramʻda oʻqing!