"Benfika" bosh murabbiyi Brunu Laje klublar o‘rtasidagi jahon chempionatida "Chelsi"ga qarshi kechgan uchrashuvdan keyin jurnalistlar savollariga javob berdi. Uning fikricha, portugaliyalik jamoa o‘yinda kurashdi, lekin ayrim detallar yetmagani sabab muhim bosqichdan chetda qoldi.
– "Benfika" har qanday musobaqada o‘z ambitsiyalariga ega. Bu gal ham istisno emasdi. Biz guruh bosqichini muvaffaqiyatli yakunladik, birinchi o‘rinni oldik va keyingi bosqichga chiqish uchun munosib imkoniyatga ega edik. Lekin, afsuski, futbolda 90 daqiqada barcha ssenariylar amalga oshishi mumkin, – dedi Laje.
Mutaxassis, ayniqsa, "Chelsi"ning jamoaviy harakatlari va ayrim futbolchilarining yuqori darajasini alohida ta’kidladi. U Pedru Netuning o‘yini haqida to‘xtalib, shunday dedi:
– Men Pedru Netuni yaxshi taniyman. Uning individual mahorati, ayniqsa, birga-bir vaziyatlarda o‘zini namoyon etadi. Uni to‘xtatish – juda murakkab vazifa. U nafaqat texnikasi, balki to‘g‘ri qaror qabul qilishi bilan ham raqiblarini ortda qoldiradi. Bizning himoyachilar harakat qildi, lekin bu yetarli bo‘lmadi.
Laje shogirdlarining ruhiy va jismoniy tayyorgarligi yaxshi bo‘lganini, ammo raqibning yuqori darajadagi bosimi va tempi oxir-oqibat hal qiluvchi omilga aylanganini tan oldi.
– Bizda imkoniyat bor edi. Ammo futbolda kerakli paytda yurak va aniqlik kerak. Ba’zi vaziyatlarda biz yetarlicha shiddat bilan harakat qilmadik, – dedi u.
Ushbu uchrashuvdagi natijaga qaramasdan, murabbiy o‘z jamoasining sa’y-harakatlarini yuqori baholadi va ularga ishonch bildirishda davom etishini ma’lum qildi. Shuningdek, kelgusida bunday yuqori bosimdagi o‘yinlarda tajriba asosiy omilga aylanishini ta’kidladi.
Brunu Lajening so‘zlaridan ma’lum bo‘lishicha, "Benfika" bu mag‘lubiyatdan saboq chiqarib, yanada kuchliroq tarkib bilan Yevropa va jahon miqyosidagi musobaqalarda o‘z so‘zini aytishga harakat qiladi. “Zamin”ni Telegramʻda oʻqing!
Ctrl
Enter
Xato topdIngizmi
Iborani ajratib Ctrl+Enter tugmasini bosing Mavzuga oid yangiliklar
