Abduqodir Husanovni o‘ynatmagani uchun muxlislar Gvardiolaga e’tiroz bildirishmoqda

Yevropa futbolida har bir mavsum yangidan-yana shov-shuvlarga boy, ayniqsa gap grand klublar haqida ketganda. Yaqinda FIFA shafe’ligidagi yangi formatda o‘tkazilayotgan klublar o‘rtasidagi jahon chempionatida “Manchester Siti”ning erta mag‘lub bo‘lishi ko‘pchilikni hayratga soldi, deb xabar berdi mancitynews.com.

Gvardiola boshchiligidagi “shaharliklar” guruh bosqichini kutilganidek yo‘qotishsiz o‘tkazgan edi. Ular faqat pley-offning dastlabki bosqichidayoq Saudiyaning “Al-Hilol” klubiga imkoniyatni boy berib, musobaqadan chetda qoldi. Bu natija, ayniqsa, jamoaning asosiy da’vogarlardan biri sifatida ko‘rilgani uchun muxlislar va ekspertlar orasida katta muhokamalarga sabab bo‘ldi.

Ayni paytda muxlislarni eng ko‘p o‘ylantirayotgan masalalardan biri — markaziy himoyachi Abduqodir Husanovning taqdiri. Jamoadagi raqobat kuchaygani fonida Xosep Gvardiolaning unga yetarli o‘yin amaliyoti bermayotgani muxlislar orasida tanqid va e’tirozlarning kuchayishiga olib keldi. Shuningdek, “Siti”ning himoyadagi muvaffaqiyatsiz o‘yinlari ham aynan Husanovni zaxiraga mixlab qo‘yish qanchalik to‘g‘ri ekani haqida savollarni kuchaytirdi.

Maxsus tahlilda mancitynews.com sayti va Devid Talli so‘nggi voqealarga to‘xtaldi:
“Manchester Siti” himoyachisi Abduqodir Husanov keyingi paytda maydonda deyarli ko‘rinmayapti. U oxirgi marta “Bornmut”ga qarshi bahsdan so‘ng Angliya kubogida o‘zini ko‘rsatgan edi. Jahon chempionatida faqat “Al-Ayn”ga qarshi o‘yinda o‘ng qanotda harakat qildi, ammo bu uchrashuvda ham unga to‘liq ishonch bildirilmadi".

Shuningdek, ekspert muxlislar fikrlariga ham urg‘u berdi. Twitter va ijtimoiy tarmoqlarda “Husanov jamoa kelajagi”, “Gvardiola unga ko‘proq imkoniyat berishi kerak”, “U tezligi bilan Diasdan yaxshiroq”, “Yangi mavsumda ham zaxirada qolmasa bo‘ldi”, degan munosabatlar ko‘paytgan.

Abduqodir Husanov, 21 yoshli markaziy himoyachi, yanvarda “Lans”dan “Manchester Siti”ga kelganidan so‘ng qisqa vaqt ichida barcha turnirlarda to‘qqizta uchrashuv o‘tkazdi. Ayniqsa, “Tottenxem”, “Real”, “Nyukasl” va “Liverpul”ga qarshi bahslarda ko‘rsatgan o‘yini mutaxassislar tomonidan yuqori baholandi. Fevral oyida u jamoaning eng yaxshi futbolchisi sifatida e’tirof etildi.

Biroq apreldan beri Xosep Gvardiola unga ishonch bildirmay qo‘ydi — Husanov faqat “Al-Ayn”ga qarshi 61 daqiqa o‘ynadi, xolos. Shu sababli ham “Manchester Siti” muxlislari orasida u kelasi mavsum ham zaxirada qolib ketmaydi, deb umid qilayotganlar soni ortib bormoqda.

Ekspertlar ta’kidlashicha, bunday yosh, tezkor va universal himoyachini ehtiyotda ushlab turish klub uchun ham, futbolchi uchun ham manfaatli emas. Ayniqsa, jamoa himoyada muammo yuzaga kelayotgan paytda, o‘zidagi iqtidordan to‘g‘ri foydalanish kerak.

Yakunda ta’kidlash kerak: Abduqodir Husanov “Manchester Siti”da uzoq muddatli kelajak uchun muhim futbolchiga aylanishi mumkin. Gvardiolaning navbatdagi mavsumda unga ishonch bildirish-bildira olmasligi esa nafaqat himoya chizig‘ining, balki butun jamoa o‘yinining kelajagiga ta’sir qilishi aniq. Muxlislar esa yaqin haftalarda bu masalaga oydinlik kiritilishini intizorlik bilan kutyapti. “Zamin”ni Telegramʻda oʻqing!