Abduqodir Husanov Angliyada eng tezkor futbolchilar qatorida!

Angliya Premer-ligasida o‘z nomi bilan tarixga kirgan Abduqodir Husanov nafaqat o‘zbekistonlik muxlislar, balki butun futbol dunyosi e’tiborini tortmoqda. Bu 21 yoshli markaziy himoyachi “Manchester Siti” safida to‘p surmoqda va buning o‘ziyoq katta voqea. Endi esa u yana bir muvaffaqiyatga erishdi — Premer-ligadagi eng tezkor futbolchilar o‘nligiga kirdi!

Metropoles manbasiga tayanib xabar berilishicha, “Nottingem Forest”ga qarshi o‘yinda Husanov soatiga 36,29 kilometr tezlikda yugurishga erishgan. Bu natija uni Mikki van de Ven, Antoni Elanga, Erling Xoland kabi yulduzlar qatoriga qo‘shdi.

Bu — nafaqat shaxsiy, balki milliy yutuq ham. Chunki bugungi kunda Abduqodir Husanov — Angliya chempionatida to‘p surgan birinchi o‘zbek futbolchisi sifatida o‘z nomini yozib qo‘ygan. Uning jismoniy tayyorgarligi, maydondagi tahlil qobiliyati va raqib harakatlarini oldindan seza bilishi hech kimni befarq qoldirmayapti.

“Manchester Siti” rasmiy sayti ham futbolchining yuqori salohiyatini alohida ta’kidladi:
– Abduqodir Husanov jamoa safida 10 ta o‘yin o‘tkazdi va bitta gol urdi. “Chelsi”ga qarshi debyut o‘yinida hayajonli bo‘lsa-da, keyingi bahslarda o‘zini to‘liq namoyon etdi. U xavfni darhol anglab yetadi va hujumlarga tezkor javob qaytara oladi. Yangi mavsumda asosiy tarkibda ko‘proq imkoniyat olishi kutilyapti, – deb yozdi mancity.com.

Angliya Premer-ligasida eng yuqori tezlik qayd etgan futbolchilar reytingining to‘liq ro‘yxati quyidagicha:

1. Mikki van de Ven (“Tottenxem”) — 37,12 km/s
2. Antoni Elanga (“Nyukasl” / “Nottingem Forest”) — 36,65 km/s
3. Brayan Mbyomo (“Brentford”) — 36,65 km/s
4. Karlush Borjesh (“Vulverxempton” / “Ayaks”) — 36,58 km/s
5. Yankuba Minte (“Brayton”) — 36,40 km/s
6. Vilson Odober (“Tottenxem”) — 36,36 km/s
7. Abduqodir Husanov (“Manchester Siti”) — 36,29 km/s
8. Antoni Elanga (ikkinchi bor) — 36,22 km/s
9. Emmanuel Agbadu («Vulverxempton») — 36,14 km/s
10. Erling Xoland (“Manchester Siti”) — 36,00 km/s

Bunday natijalar shunchaki emas. Ular ortida tinimsiz mehnat, mashg‘ulotlarga sadoqat va jamoaga bo‘lgan muhabbat yotadi. Husanovning har bir harakati, har bir yugurishi — Vatan sharafini maydonda himoya qilishning yorqin namunasidir.

Shubha yo‘qki, Abduqodir Husanov yangi mavsumda ham katta sahnada yanada porlab, yana ko‘plab yutuqlarga erishadi. O‘zbekistonlik muxlislar esa uning har bir qadamini faxr bilan kuzatishda davom etadi. “Zamin”ni Telegramʻda oʻqing!