“Bashakshehir” yoki SSKA: Abbosbek Fayzullayevning tanlov oldidagi qarori

Musobaqalar va transferlar faslida futbol olamidagi kutilmagan yangiliklar muxlislarni doimo hayajonga soladi. Mana, bu safar ham e’tibor markazida — O‘zbekiston milliy terma jamoasi va SSKA klubining ko‘p qirrali, hujumkor futbolchisi Abbosbek Fayzullayev turibdi.

So‘nggi paytda turli manbalarda yosh va iqtidorli legionerga Turkiyaning kuchayib borayotgan Superliga jamoalari, xususan, “Istanbul Bashakshehir” klubi tomonidan jiddiy qiziqish borligi haqida xabarlar tarqalmoqda. Ma’lumotlarga ko‘ra, turk klubi yangi mavsumda sovrinlar va Yevropa musobaqalari uchun kurash olib borish maqsadida, safini kuchaytirishga katta e’tibor qaratayotgan ekan.

Aytish joizki, “Bashakshehir” shunday maqsad yo‘lida bir necha kun oldin milliy terma jamoamizning yorqin yulduzi va to‘purari Eldor Shomurodovni “Roma”dan olib kelgan edi. Endi esa asosiy diqqat Abbosbek Fayzullayevga qaratilib, klub bu transferga katta mablag‘ sarflashga tayyor.

Manbalarga ko‘ra, “Bashakshehir” klubi SSKA bilan muzokaralarni faol olib boryapti. Turklar Abbosbek uchun moskvaliklarga 7,5 million yevro va qo‘shimcha bonuslar taklif qilyapti. Eng asosiysi, bu mablag‘ni bir vaqtning o‘zida SSKA hisob-raqamiga o‘tkazishga rozi ekanliklari klubning jiddiy niyatidan darak beradi.

Bir vaqtning o‘zida, Rossiya futboli muhitida Fayzullayevning kelajagi haqida turlicha fikrlar aytilayapti. Ayrim ekspertlar, uning Rossiyada qolgani manfaatliroq, deb hisoblashmoqda. Boshqalar esa, aksincha, yangi chempionatga o‘tish orqali uning professional rivojlanishiga yanada yo‘l ochilishini ta’kidlashmoqda.

SSKAning sobiq himoyachisi Ivan Taranov shunday deydi:
— Futbolchi qanday qaror qabul qilishidan avval, uning shaxsiy maqsadlari va orzularini o‘rganish lozim. Agar Abbos yangi chempionatga intilayaptimi, unda klub ham unga to‘sqinlik qilmasligi kerak. Ammo futbolchida SSKAga sadoqat va Rossiyada qolish ishtiyoqi bor bo‘lsa, undan voz kechish ham shoshma-shosharlik bo‘lardi.

Ushbu masalada to‘g‘ri yechim qabul qilish har tomonlama manfaatli bo‘ladi. Axir futbolda bir sxemada qolib ketish yoki shunchaki “qolish uchun qolish” mutlaqo to‘g‘ri yo‘l emas. Maydonda har bir futbolchi o‘z salohiyatini to‘liq namoyon etishi kerak.

Qiziq tomoni shundaki, Abbosbekning o‘zi transfer borasida hozircha aniq so‘z aytgani yo‘q. Rossiya Superkubogi bahsida ham bu mavzuda undan so‘rashganida, u faqat jahon chempionatiga chiqish o‘z hayotidagi muhim voqea ekanini, ammo SSKA bilan qo‘lga kiritilgan sovrinlarni ham yuksak baholashini ma’lum qildi. Futbolchi har bir muvaffaqiyat va natija o‘zi uchun alohida qiymatga ega ekanini ta’kidladi va kelajak borasida aniq so‘z aytishga shoshilmadi.

- Jahon chempionatiga chiqish – tarixiy voqea. Biroq SSKA bilan qo‘lga kiritilgan ikki sovrin ham men va oilam uchun muhim. Har bir jarayonning o‘z qiymati bor va shu uchun ham bu ikki muvaffaqiyatni taqqoslamayman.

Super kubok uchun bo‘lgan uchrashuv SSKAdagi oxirgi o‘yin desa bo‘ladimi? Men bu narsa haqida gapirmoqchi emasman. Chunki nimalar bo‘lishini o‘zim ham bilmayman, - dedi Abbosbek Fayzullayev.

Shu bilan birga, Abbosbek Fayzullayevning SSKAdagi natijalari tahsinga loyiq. 2023 yil avgustidan buyon “armiyachilar” safida 72 ta uchrashuv o‘tkazib, sakkizta gol urgan va jamoadoshlariga 22 marotaba assistentlik qilgan. Transfermarkt portali ma’lumotiga ko‘ra, uning narxi 8 million yevro atrofida baholanmoqda. Abbosbekning shartnomasi 2026 yil yozigacha amal qiladi, ammo kelishuvni yana bir yilga uzaytirish imkoniyati mavjud.

Yakunda shuni aytish mumkinki, yosh legionerning transferi nafaqat o‘zbekistonlik muxlislar, balki turk va rossiyalik futbol olami vakillari uchun ham qiziqarli voqealar rivojini va’da qilmoqda. Abbosbek Fayzullayev qayerda to‘p surmasin, uning rivoji va yangi marralar sari intilishi barcha uchun namuna bo‘ladi. Yangi mavsum qanday voqealar bilan e’tibor markaziga aylanadi — yaqin kunlarda ma’lum bo‘ladi. “Zamin”ni Telegramʻda oʻqing!