“Real”da yetakchi almashdi: yangi sardor nomi ma’lum qilindi

“Real”da yangi davr boshlandi: Dani Karvaxal endi jamoaning rasmiy sardori

Madrid klubining ikki tajribali yulduzi – Luka Modrich va Lukas Vaskes jamoani tark etganidan so‘ng, jamoada yetakchilik vazifasini kim o‘z zimmasiga olishi mavzusida ko‘plab savollar tug‘ilgan edi, deb xabar berdi as.com.

Uzoq yillar davomida “Real” safida mehnat qilgan va o‘z professionalligi hamda fidoiyligi bilan boshqalarga namuna bo‘lgan Dani Karvaxalga endi sardorlik bog‘ichi ishonib topshirildi. Uning jamoaga va muxlislarga bo‘lgan sadoqati uni bu o‘ringa munosib qilib ko‘rsatdi.

Karvaxal – “Real” tarbiyalanuvchisi. Uning butun faoliyati deyarli faqat ushbu klubga bag‘ishlangan. U klubda nafaqat professional futbolchi, balki ichki muhitdagi muvozanatni saqlaydigan shaxs sifatida ham qadrlanadi.

Avvalgi sardor Luka Modrich jamoaning haqiqiy ruhiy yetakchisi sifatida tanilgan edi. Uning ketishi klub muxlislari uchun og‘riqli bo‘ldi. Lekin endi Karvaxal ana shu o‘rinni munosib ravishda egallashi kutilmoqda.

Shu bilan birga, klub ichki tuzilmasida ham yangi islohotlar amalga oshirildi. Endi Karvaxalning birinchi o‘rinbosari sifatida Federiko Valverde belgilandi. Jismoniy holati, tinimsiz harakati va turli pozitsiyalarda samarali o‘ynashi bilan u so‘ngi yillarda jamoaning eng barqaror a’zolaridan biriga aylandi.

Bundan tashqari, ikkinchi o‘rinbosar sifatida Tibo Kurtua va Vinisius Junior kabi yulduzlar ham hisobga olingan. Kurtua — jamoaning kalit nuqtasi bo‘lgan posbon. Uning tajribasi va tinchlantiruvchi tabiati o‘yinda ko‘p marta muhim ahamiyat kasb etgan.

Vinisius esa yosh bo‘lishiga qaramay, jamoaning so‘nggi yillardagi yuziga aylangan. Uning to‘p bilan harakatlari, muxlislar bilan munosabati va doimo kuchli raqiblarga qarshi hujumkor o‘yini uni nafaqat marketing jihatdan, balki sardorlik uchun ham munosib nomzodga aylantirmoqda.

Jamoa rahbariyati ushbu qaror orqali ichki muhitni barqaror saqlashni, o‘yinchilar o‘rtasidagi o‘zaro ishonchni mustahkamlashni maqsad qilgan. Bu esa yangi mavsumda “Real” uchun muhim omil bo‘lib xizmat qilishi mumkin.

Muxlislar esa endi Karvaxal yetakchiligidagi jamoadan yuqori natijalar kutmoqda. Chunki sardor nafaqat maydonda, balki uning tashqarisida ham jamoaning yuragi bo‘lishi kerak.

Yangi sardor – yangi tarix. “Real” bu qaror bilan kelajakka dadil qadam qo‘ymoqda. Qolganini esa vaqt va natijalar ko‘rsatadi. “Zamin”ni Telegramʻda oʻqing!