Uels futbolining mashhur vakillaridan biri, "Liverpul" klubi bilan ikki karra Yevropa chempioni bo‘lgan va "Mr. Wrexham" laqabi bilan tanilgan Joey Jones 70 yoshida hayotdan ko‘z yumdi. Uning vafoti haqida Uels Futbol Assotsiatsiyasi va Wrexham futbol klubi rasmiy bayonot orqali ma’lum qildi.
Wrexham klubi bildirgan bayonotga ko‘ra, Jones uzoq davom etgan kasallikdan so‘ng erta tongda vafot etgan.
“Wrexham AFC klubi afsonasi Joey Jonesning vafoti bizni chuqur qayg‘uga soldi,” — deyiladi klub xabarida.
Liverpuldagi porloq faoliyati
1975-yilda Wrexhamdan Liverpulga ko‘chib o‘tgan Joey Jones qisqa vaqt ichida klub muxlislari mehrini qozondi. U Liverpul tarkibida:
- 2 marta Yevropa Chempionlar Kubogini (1977, 1978),
- 1 marta Angliya chempionligini (1977),
- UEFA Kubogi va Yevropa Superkubogini qo‘lga kiritdi.
Liverpul klubi ham uning o‘limidan chuqur qayg‘uda ekanini bildirib, shunday bayonot berdi:“Joeyning fidoyiligi va professionalligi uni har doim Liverpul muxlislarining sevimlisiga aylantirgan. Hozirda barcha o‘ylarimiz uning oila a’zolari va yaqinlari bilan.”
Wrexham: Uydagi qahramon
Jones o‘z faoliyatini Wrexham klubida boshlagan va bu jamoada uchta alohida davrda o‘ynagan. U klub uchun nafaqat futbolchi sifatida, balki murabbiy, yoshlar jamoasi ustozi, vaqtinchalik bosh murabbiy va elchi sifatida ham xizmat qilgan.
“U maydonda va undan tashqarida haqiqiy afsona edi. Har doim insonlarga vaqt ajratar, samimiy va kamtar edi. Uning o‘rni hammamizga seziladi,” — deya ta’kidladi Wrexham.
Klub Joey Jones xotirasiga stadion oldida haykal o‘rnatilishini ham e’lon qildi.
Uels milliy terma jamoasi va boshqa klublar
1975-yildan 1986-yilgacha Jones Uels terma jamoasi safida 72 marta maydonga tushgan, chap qanot himoyachisi sifatida faoliyat olib borgan.
U faoliyati davomida Chelsi va Huddersfield klublarida ham to‘p surgan. “Zamin”ni Telegramʻda oʻqing!
Ctrl
Enter
Xato topdIngizmi
Iborani ajratib Ctrl+Enter tugmasini bosing
Mavzuga oid yangiliklar
