Yozning qizg‘in pallasiда Angliya klublari tomonidan amalga oshirilgan transferlarning moliyaviy tahlili ko‘pchilik muxlislar uchun qiziqish uyg‘otmoqda.
Transferlarga ixtisoslashgan xalqaro portal Transfermarkt mutaxassislari tomonidan tayyorlangan so‘nggi hisobotga ko‘ra, yangi mavsum arafasida eng katta sarf-xarajat qilgan jamoa “Liverpul” bo‘lib turibdi. Chempionlikka da’vogarlar tarkibni mustahkamlash maqsadida 308,86 million yevro sarfladi va bu pulga jami olti nafar futbolchi olib keldi.
“Liverpul” safini to‘ldirgan yangi o‘yinchilar orasida jahon futbolining yorqin namoyandalari: pleymeyker Florian Virts (125 million yevro), markaziy hujumchi Ugo Ekitike (95 million yevro) va chap qanot himoyachisi Milosh Kerkez (46,9 million yevro) ham bor.
Ikkinchi o‘rinda “Chelsi” klubi qayd etilgan. Londonliklar ushbu yozgi transferlar oynasidan foydalanib, tarkibga 243,77 million yevro sarfladi. “Aristokratlar”ning eng qimmat bitimi qanot hujumchisi Jemmi Gittens (64,3 million yevro) bo‘ldi. Shuningdek, klub ikki markaziy hujumchi — Joao Pedro (63,7 million yevro) va Liam Diap (35,5 million yevro)ni tarkibga qo‘shdi.
Moliyaviy xarajatlar bo‘yicha “top-10”likda quyidagi jamoalar ham bor:
-
“Arsenal” (157,8 million yevro)
-
“Manchester Yunayted” (153,2 million yevro)
-
“Manchester Siti” (145,7 million yevro)
-
“Tottenxem Xotsur” (140,6 million yevro)
-
“Sanderlend” (115,9 million yevro)
-
“Brayton” (80 million yevro)
-
“Bernli” (79,75 million yevro)
-
“Lids” (69,4 million yevro)
Shuni aytish joizki, Yevropada yozgi transferlar oynasi yakunlanishiga hali ancha vaqt bor. Shunga ko‘ra, ushbu statistikadagi raqamlar va tartiblarda yana o‘zgarishlar bo‘lishi tabiiy va kutilgan holat. Muxlislar esa to‘p-surish sahnasining yangi yulduzlarini va yirik bitimlarni qiziqish bilan kuzatishda davom etadi.
“Zamin”ni Telegramʻda oʻqing!
