Kataloniyaning mashhur klubi — “Barselona” 2025/26 yilgi mavsumni katta maqsadlar bilan qarshi olishga tayyorlanmoqda. Klub prezidenti Joan Laporta yaqinda bergan intervyusida jamoaning yangi mavsumdagi rejalari va intilishlari haqida atroflicha fikr bildirdi. Uning ta’kidlashicha, “ko‘k-anorranglilar” yangi mavsumda barcha musobaqalarda g‘alaba uchun kurash olib borishni maqsad qilgan.
— Biz jamoamizni yanada kuchaytirdik va endi eng muhim narsa — g‘alaba uchun kurashishdir, — deya ta’kidladi Laporta. — O‘tgan mavsumda ko‘plab yodda qolarli daqiqalarni boshdan kechirdik. Yangi mavsum ham shundan kam bo‘lmasligiga, balki undan ham yuqori darajada o‘tishiga ishonchim komil. Biz har bir musobaqada yutishga harakat qilamiz.
Klub rahbari o‘z so‘zlarida jamoa salohiyatiga ishonch bildirib, muxlislarga yaxshi natijalar va’da qildi. Uning fikricha, jamoa tarkibidagi muvozanat, yoshlar va tajribali futbolchilarning uyg‘unligi "Barselona"ni yuqori marralarga olib chiqadi.
Eslatib o‘tamiz, “Barselona” o‘tgan mavsumni juda muvaffaqiyatli tarzda yakunlagan. Kataloniyaliklar La Ligani birinchi o‘rinda yakunlab, “Real Madrid”ni 4 ochko farq bilan orqada qoldirishgandi. Shuningdek, jamoa Xans-Diter Flik boshchiligida Ispaniya Kubogi va Superkubokni ham o‘z sovrinlari qatoriga qo‘shib qo‘ygan.
Endi esa barcha ko‘zlar yangi mavsumdagi ilk rasmiy uchrashuvga qaratilgan. "Barselona" 2025/26 yilgi mavsumdagi debyut o‘yinini 16 avgust kuni mehmon sifatida "Malorka" jamoasiga qarshi o‘tkazadi. Bu uchrashuv jamoaning mavsum boshida qanday formada ekanini namoyon qiladi.
Muxlislar esa sevimli jamoasi yana yangi titullar uchun kurash olib borishiga umid qilmoqda. “Kamp Nou”da yonadigan ushbu katta maqsadlar jamoaning yangi mavsumdagi safarini yanada qiziqarli va kurashlarga boy qilishi aniq.
