Portugaliya futbolining dunyodagi eng yorqin yulduzlaridan biri — Krishtianu Ronaldu navbatdagi mavsumda o‘z jamoasi “An-Nasr” bilan Saudiya Arabistonining chempionlik pedestaliga ko‘tarilishga ishonmoqda.
Riyodda joylashgan mashhur klubda yangi mavsum katta o‘zgarishlar bilan boshlandi. Jamoa bosh murabbiyi etib portugaliyalik tajribali mutaxassis — Jorje Jezush tayinlandi. U o‘z vaqtida “Al-Hilol” bilan yuqori natijalarga erishgan va endi "An-Nasr" safida ham yangi ruh, ilhom va taktik qarashlarni joriy etishga kirishdi.
Ronaldu murabbiyga katta umid bilan qaraydi. U shunday degan:
“Jorje Jezush jamoaga yangi ruhiyat, yangicha yondashuv va katta motivatsiya olib kiradi. Biz hozircha asta-sekin rivojlanmoqdamiz, ammo mashg‘ulotlar yuqori saviyada o‘tmoqda. Mening bu yilgi eng katta orzuyim — barqarorlikni saqlab qolib, chempionlik sari intilish. Bu oson bo‘lmaydi, ammo biz bunga tayyormiz”.
Aslida “An-Nasr” jamoasi o‘tgan mavsumda ham jiddiy raqobatchilar safida edi va Saudiya chempionatida uchinchi o‘rinni egallab, o‘z so‘zini aytgandi. Ammo bugungi kunda jamoa katta maqsadlar sari intilayotgani, o‘yin uslubida sezilarli o‘zgarishlar bo‘layotgani ko‘zga tashlanmoqda.
Muxlislar uchun esa yanada quvonarli holat — Ronalduning motivatsiyasi yuqori. U har bir o‘yinda bor kuchini berib, jamoani yetaklashga tayyor ekanini namoyon qilmoqda.
Mavsumning bu dastlabki kayfiyati ko‘p narsadan darak beradi. Agar “An-Nasr” barqaror o‘yinlar namoyish eta olsa, bu yilgi chempionlik uchun asosiy da’vogarlardan biriga aylanishi mumkin.
Shunday ekan, yangi mavsumda bizni qizg‘in kurashlar, katta intriga va, albatta, Ronalduning mahoratli o‘yinlari kutmoqda.
