Kataloniyaning mashhur futbol klubi “Barselona”da juda ham g‘ayrioddiy, hatto murakkab vaziyat yuzaga keldi. Jamoaning asosiy darvozaboni va muxlislar qalbini zabt etgan nemis futbolchisi Mark-Andre ter Shtegen jamoadagi mavqeini yo‘qotish arafasida qoldi. Bu haqda futbolchi shaxsan o‘zi rasmiy bayonot bilan chiqdi.
Eslatib o‘tamiz, yaqinda "Barsa" klubi ter Shtegendan sardorlik bog‘ichini olib qo‘yganini ochiq e’lon qilgan edi. Bu qarorning ortida, darvozabon tomonidan klub uchun muhim bo‘lgan tibbiy hujjat — uning jarohati haqidagi xulosani imzolamasligi turgani aytildi. Ushbu xulosa klubga ter Shtegenning jarohati uzoq davom etishi mumkinligini rasman tasdiqlashga va shu orqali yangi kelgan futbolchilarni La Ligaga ro‘yxatdan o‘tkazishda osonlik yaratishga xizmat qilar edi.
Biroq futbolchining o‘zi bu voqealarning aslida qanday kechganini yoritishga qaror qildi. U shunday deydi:
— “So‘nggi haftalarda men haqimda tarqalayotgan gap-so‘zlarning aksar qismi umuman haqiqatga to‘g‘ri kelmaydi. Shu boisdan o‘z fikrimni samimiy, lekin aniq ifoda etishni lozim topdim. Jarrohlik amaliyotini o‘tkazish haqidagi qaror men va tibbiyot xodimlari o‘rtasidagi professional maslahatlar natijasida qabul qilindi. Bu jarayon “Barselona” rahbariyati tomonidan ham to‘liq qo‘llab-quvvatlandi. Hammamiz bir maqsad — mening tezroq to‘liq sog‘ayib, klubga maydonda yordam berishimni xohladik”.
Futbolchi o‘z tiklanish davri haqida jamoatchilikni xabardor qilganini, shifokorlar esa minimal tuzalish muddatini aniq bayon qilganini qayd etdi.
Shu bilan birga, Mark-Andre so‘nggi paytlarda jamoada amalga oshirilgan transfer va shartnoma yangilanishlari jarrohlikdan avval qilinganini ta’kidladi.
— “Shu sababli men hech qachon o‘z amaliyotimning boshqa futbolchilarning ro‘yxatdan o‘tishi uchun monea bo‘lishini tasavvur ham qilmaganman. Bu haqda tarqalayotgan boshqa har qanday fikrlar menga nisbatan nohaq va noxolis deb o‘ylayman”, — deb yozgan u bayonotida.
Darvozabon o‘zining professional munosabatini saqlayotganini, klubga hurmatini yo‘qotmaganini va har qanday vaziyatni muloqot yo‘li bilan hal qilishga tayyor ekanini ta’kidladi.
— “Men “Barselona” sharafini himoya qilishni sharaf deb bilaman va har doim klub bilan bir yo‘nalishda harakat qilishga tayyorman. Bunday vaziyatlarda ham aql bilan, mulohaza bilan yechim topish mumkin”, — deb yakunladi ter Shtegen.
Ter Shtegenning ushbu bayonoti klubdagi ichki muhitda qanday o‘zgarishlarga sabab bo‘lishi hozircha noma’lum. Ammo bir narsa aniq: bu vaziyat nafaqat futbolchining, balki butun “Barselona” jamoasining ichki munosabatlariga ham ta’sir qilishi mumkin. Muxlislar esa o‘z sevimli darvozabonlari atrofidagi holatlar ochiq va adolatli hal bo‘lishiga umid bog‘lamoqda.
