“Manchester Siti”ning mahoratli bosh murabbiyi Pep Gvardiola jamoa tarkibidagi o‘yinchilar sonining ko‘pligi unga ma’qul emasligini ochiqchasiga bayon qildi. Uning fikricha, jamoa samarali ishlashi uchun ixcham va muvozanatli tarkib zarur.
“Biz tarkibdagi futbolchilar sonini qisqartirishimiz kerak. Menga bunchalik ko‘p o‘yinchi bilan mashg‘ulot olib borish ma’qul emas. Ko‘plab o‘yinchilar jamoani tark etishlari zarur. Transfer oynasi hali ochiq va biz bir nechta futbolchi bilan xayrlashishimiz mumkin. Vaqt ko‘rsatadi, kim qayerga yo‘l olishini”, — deb ta’kidladi Gvardiola.
Ispaniyalik murabbiyning bu gaplari jamoada raqobat darajasi yuqori ekanligini va ayrim futbolchilarga doimiy o‘yin amaliyoti berish imkoniyati cheklanganini anglatadi. Shu bois, u yangi mavsum ostonasida ortiqcha to‘planib qolgan tarkibni optimallashtirishni maqsad qilgan.
Avvalroq, joriy yozda klub safini Shtefan Ortega, Jeyms Makati, Ederson va Jek Grilish kabi nomdor futbolchilar tark etishi mumkinligi haqida xabarlar tarqalgan edi. Bu esa Gvardiolaning so‘zlarini yanada kuchliroq ma’no bilan to‘ldiradi.
Muxlislar esa, kimlar jamoada qolishi va kimlar boshqa klublarga yo‘l olishini qiziqish bilan kutmoqda. Chunki “Manchester Siti”da har bir transfer qarorining ortida katta strategiya va jamoaning kelajak rejasi yotadi.
