Futzal bo‘yicha O‘zbekiston Superkubogiga mehmon sifatida taklif etilgan futbol afsonasi Roberto Karlos matbuot anjumanida ishtirok etdi. Maydondan tashqaridagi samimiy muloqotda u ham yurtimiz futboliga bergan baho, ham o‘ziga yaqin insonlar haqida iliq fikrlarini bayon etdi.
Savol: O‘zbekiston terma jamoasining sobiq sardori Odil Ahmedov bilan “Anji”da birga o‘ynagansiz. O‘sha davrlardan qanday umumiy xotiralar qolgan?
Roberto Karlos: — Iliq xotiralarni yodga tushirgan savolingiz uchun katta rahmat. Odil Ahmedov jamoamizga kelgan paytdayoq uning salohiyatiga amin bo‘lganman. Maydonni ko‘ra bilishi, o‘yinni o‘qishi, tashkil etish qobiliyati va aniq to‘p uzatishlari bilan yuqori darajadagi futbolchi ekanligini isbotlagan. Odil bilan birga to‘p tepish men uchun sharaf bo‘lgan. Odil bilan yaxshi do‘st, o‘rtoq bo‘lib qolganmiz. Kecha futzal uchrashuvini birgalikda o‘tirib, tomosha qildik. U bilan yana diydorlashganimdan xursandman.
Superkubokka taklif bois O‘zbekistonga keldim. Mamlakatingiz futbolining juda tez, jadal o‘sayotganini o‘z ko‘zim bilan ko‘rdim. Barchangizni Jahon chempionati yo‘llanmasi bilan tabriklayman. Bizni Toshkentga, ajoyib tadbirga taklif etganliklari uchun O‘FF rahbariyatiga minnatdorligimni bildiraman.
Savol: — Xabi Alonso boshchiligida “Real” qanchalik yuksak natijalarni qayd eta oladi?
Roberto Karlos: — Men “Real”ning faxriy elchisiman. Ko‘p ma’lumot bera olmayman. “Real” katta klub. Hamisha yuksak marralarni ko‘zlab, ulkan maqsad sari harakat qiladi. Bu jamoaga har bir mutaxassis har tomonlama tayyor bo‘lib keladi. Xabi Alonsoda ham katta ishtiyoq bor. Biz uni qo‘llab-quvvatlaymiz. Unga ishonamiz.
Qisqacha aytganda, Roberto Karlosning nutqi ikkita asosiy mezonni yoritdi: shaxsiy mehr va hurmat (Odil Ahmedov bilan bog‘liq xotiralar) hamda professional yondashuv («Real»ga xos katta maqsadlar, Xabi Alonso figurasiga ishonch). Afsona fikrlaridagi ushbu ruh — Superkubok kechasidagi kayfiyat kabi — muxlislarga yangi ilhom ulashdi.
“Zamin”ni Telegramʻda oʻqing!
