Topuriya atrofidagi shov-shuv: «UFC 322» jangi haqidagi xabarlar yolg‘on bo‘lib chiqdi

Yaqin kunlarda ommaviy axborot vositalarida yengil vazn toifasida UFC chempioni hisoblangan Iliya Topuriya haqida turli mish-mishlar tarqaldi. Ayniqsa, uning «UFC 322» turniri doirasida Jastin Getjiga qarshi oktagonga chiqishi mumkinligi haqida xabarlar keng muhokamalarga sabab bo‘ldi. Biroq, o‘tgan kecha vaziyatga aniqlik kiritildi.

Chempionning menejeri Lukash Orzel bu ma’lumotlarni rasman rad etdi. Uning ta’kidlashicha, tarqalgan xabarlar haqiqat bilan hech qanday bog‘liq emas va barchasi soxta manbadan tarqalgan.

«Jastin Getjiga qarshi jang haqidagi gaplar — to‘liq asossiz. Kimdir soxta akkaunt orqali mening nomimdan soxta surat tarqatgan va keyin o‘chirib tashlagan. Afsuski, ayrim OAVlar buni tekshirishga urinmay, ma’lumotni tarqatishga shoshilishgan. Aslida esa Iliya hozir hatto mashg‘ulot lagerida ham emas, chunki unga jang bo‘yicha hech qanday rasmiy taklif berilmagan», — deya urg‘u berdi Orzel.

Topuriyaning muxlislari uchun bu xabar biroz noqulay bo‘lsa-da, u hozirgi holatda faqat dam olish va tiklanish jarayoni bilan band. Uning keyingi raqibi kim bo‘lishi haqida esa hozircha hech qanday aniqlik yo‘q.

Eslatib o‘tamiz, Iliya Topuriya oxirgi marta «UFC 317» turnirida oktagonga chiqib, braziliyalik mashhur jangchi Charlz Oliveyrani birinchi raunddayoq nokautga uchratgan edi. Bu g‘alaba orqali u o‘z chempionlik nufuzini yanada mustahkamlagandi.

Shu tariqa, Iliya Topuriya kelgusi jang haqidagi barcha savollarga hozircha aniq javob bermagan. Ammo u qaysi raqib bilan oktagonga qadam qo‘ymasin, muxlislar uning jangini katta qiziqish bilan kutmoqda.