Jahon chempionati–2026 saralash uchrashuvlarida Qozog‘iston terma jamoasi navbatdagi yirik mag‘lubiyatni qayd etdi. Safarda Belgiyaga qarshi kechgan bahsda qozog‘istonliklar 0:6 hisobida maydonni tark etishdi. Bu natija ketma-ket to‘rtinchi mag‘lubiyat bo‘lib, so‘nggi to‘rt o‘yinda umumiy hisob 1:12 ni tashkil etdi.
Uchrashuvdan keyin Qozog‘iston milliy terma jamoasi bosh murabbiyi Ali Aliyev jurnalistlar bilan muloqotda barcha aybni o‘z zimmasiga oldi.
– Qisqacha aytaman. Bugungi natija uchun to‘liq mas’uliyat mening yelkamda. Hech bir futbolchini aybdor qilmayman, chunki ular maydonda qo‘lidan kelgan barcha harakatni qilishdi. Bu – mening xatolarim. Shu sababli ariza yozib, iste’foga chiqish niyatim bor. Yurtimizga qaytgach, prezident va Qozog‘iston futbol federatsiyasi rahbariyatini bu qarorim haqida xabardor qilaman, – dedi Aliyev.
Mavsum boshidan beri turli tanqidlarga duch kelayotgan murabbiyning bu so‘zlari futbol jamoatchiligi orasida katta qiziqish uyg‘otdi. Chunki terma jamoa 5 ta o‘yinda atigi 3 ochko jamg‘arib, J guruhida 4-o‘rinni egallab turibdi.
Mutasaddilar va muxlislar Ali Aliyevning qarorini qanday qabul qilishi, hamda uning o‘rniga kim tayinlanishi hozircha noma’lum. Bir narsa aniq – Qozog‘iston termasi oldidagi saralash bahslarida vaziyatni yaxshilash uchun jiddiy choralar ko‘rilishi zarur.
Shu bois, terma jamoa atrofidagi bu vaziyat yaqin kunlarda ham keng muhokama etilishi tabiiy.
“Zamin”ni Telegramʻda oʻqing!
