Angliyaning Liverpul shahrida bo‘lib o‘tayotgan kattalar o‘rtasidagi jahon chempionatida hamyurtimiz To‘rabek Xabibullayev navbatdagi bahsini yuqori saviyada o‘tkazdi. -90 kg vazn toifasida ringga ko‘tarilgan charm qo‘lqop ustamiz qozog‘istonlik Sag‘indik Tog‘ambayga qarshi bellashdi.
Jang boshidanoq Xabibullayev tashabbusni qo‘lga olib, raqibini qiyin ahvolda qoldirdi. Uch raund davomida u barcha texnik va taktik ustunligini ko‘rsata oldi. Raqib qancha harakat qilmasin, To‘rabekning tezkorlik va kuch bilan olib borgan zarbalari uning imkoniyatlarini cheklab qo‘ydi.
Bellashuv so‘nggiga qadar shiddat bilan kechdi. Ammo barcha raundlarda hukmronlik qilgan Xabibullayevning ustunligi hakamlar qarorida ham aks etdi. Ular yakdillik bilan 5:0 hisobini qayd etishdi va shu tariqa hamyurtimiz navbatdagi bosqichga yo‘l oldi.
Mazkur g‘alaba orqali Xabibullayev nafaqat o‘zining yuksak mahorat va tayyorgarligini namoyish etdi, balki milliy terma jamoamiz g‘ururini yanada yuksaltirdi. Endi undan keyingi bosqichlarda ham yuqori natijalar kutilmoqda.
Shu bilan birga, hamyurtimizdan keyin ringga yana bir bokschimiz – Feruza Kazakova chiqishi kutilyapti. U Mo‘g‘iliston vakili Mungunsaran Balsanga qarshi bahs olib boradi. Ushbu to‘qnashuv ham muxlislar tomonidan katta qiziqish bilan kutilmoqda.
