Indoneziya poytaxti Jakarta shahrida o‘smirlar o‘rtasidagi Osiyo chempionatining ikkinchi kungi saralash bellashuvlari yakuniga yetdi. Musobaqa tatamilarida yurtimiz nomidan ishtirok etayotgan sportchilarimiz muxlislarga kutilganidek zavqli kun ulashdi.
Kun davomida o‘zbekistonlik bir qator yosh mahorat egalari muvaffaqiyatli ishtirok etib, muhim natijalar qayd etdi. Xususan, Maftuna Ahmedova, Intizor Uzakbayeva, Jo‘rabek Eshpo‘latov va Alibek Durdiyev kechki final blokiga yo‘l oldi. Ular Osiyo chempionatining eng nufuzli – oltin medali uchun tatamiga chiqishadi.
Shuningdek, yana olti nafar dzyudochimiz bronza medali uchun kurash olib borishi ma’lum bo‘ldi. Bu sportchilarimiz uchun ham o‘z salohiyatini namoyon qilish va medal kolleksiyasiga qo‘shish imkoniyati hisoblanadi.
Bronza medali uchun bahslarda:
-57 kg vazn: Gulsanam Hazratova – Ayday Kakitayeva (Qirg‘iz Respublikasi)
-63 kg vazn: Zuhrajon Umarova – Sashenko Fatima (Indoneziya)
-73 kg vazn: Sa’dulla Ravshanov – Min Suң Jeon (Koreya Respublikasi)
-73 kg vazn: Daulet Turdiyarov – Yegor Krivolapov (Qirg‘iz Respublikasi)
+70 kg vazn: Zarina Bobonazarova – Akmarjan Turdajiyeva (Qirg‘iz Respublikasi)
-90 kg vazn: Inomjon Bahodirov – Alixan Saliyev (Qirg‘iz Respublikasi)
Oltin medali uchun final bahslari:
-57 kg vazn: Maftuna Ahmedova – Inju Jumajan (Qozog‘iston)
-70 kg vazn: Intizor Uzakbayeva – Jueun Shin (Koreya Respublikasi)
-90 kg vazn: Jo‘rabek Eshpo‘latov – Min Seok Jeon (Koreya Respublikasi)
+90 kg vazn: Alibek Durdiyev – Munhbagana Galsandamba (Mo‘g‘uliston)
O‘zbekiston dzyudo federatsiyasi ma’lumotiga ko‘ra, yosh polvonlarimiz tayyorgarlikdan ruhlanib, final va bronza bahslarida ham muxlislarni quvontiradi, degan umid katta.
Bu natijalar nafaqat jismoniy kuch, balki psixologik barqarorlik va sabr-matonat orqali qo‘lga kiritilayotganini ko‘rsatmoqda. Muxlislar esa kechki finallarda vatan yoshlari g‘alaba bayrog‘ini yana baland ko‘tarishiga ishonch bildirishmoqda.
“Zamin”ni Telegramʻda oʻqing!
