«Manchester Yunayted» klubi rahbariyati yaqinda o‘tkaziladigan uchta uchrashuv jamoa bosh murabbiyi Ruben Amorimning kelajagini belgilab berishi mumkinligini ma’lum qildi. Bu haqda Mirror nashri orqali xabar tarqatildi.
Ma’lumotlarga ko‘ra, portugaliyalik mutaxassis mavsum boshlanganidan buyon vaziyatning og‘irligini anglab turibdi. Mankunianliklar dastlabki to‘rtta bellashuvda atigi to‘rt ochko to‘plashga muvaffaq bo‘lishdi va turnir jadvalida 14-pog‘onada joylashib turibdi.
Klubning keyingi bellashuvlari jiddiy ahamiyat kasb etadi. «Qizil iblislar» 20 sentyabr kuni «Chelsi»ga qarshi maydonga tushishsa, 27-sentyabrda «Brentford» bilan, 4-oktyabrda esa «Sanderlend»ga qarshi bahs olib borishadi. Aynan shu uchrashuvlarda qayd etiladigan natijalar Amorimning lavozimida qolish-qolmasligiga asosiy mezon bo‘ladi.
Eslatib o‘tamiz, 40 yoshli Ruben Amorim o‘tgan yilning noyabr oyida «Manchester Yunayted» jamoasiga bosh murabbiy sifatida tayinlangan edi. Shundan beri u o‘z uslubini jamoaga singdirishga harakat qilmoqda, ammo hozircha natijalar muxlislar va rahbariyat kutgan darajada emas.
Kelgusi o‘yinlar nafaqat jamoa uchun, balki murabbiyning taqdiri uchun ham hal qiluvchi ahamiyat kasb etadi.
“Zamin”ni Telegramʻda oʻqing!
