«Benfika» klubi matbuot xizmati mashhur mutaxassis Joze Mourinoning jamoaga bosh murabbiy etib tayinlanganini rasman e’lon qildi.
Klub va 62 yoshli portugaliyalik murabbiy o‘rtasida ikki yillik kelishuv imzolandi. Bu xabar futbol olamida katta qiziqish uyg‘otdi, chunki Mourino faoliyati davomida turli yirik klublarda ishlab, ko‘plab yutuqlarga erishgan.
E’tiborli jihati shundaki, Mourino so‘nggi bor «Fenerbaxche»da ishlagan va uning lavozimidan ketishiga sababchi bo‘lgan mag‘lubiyat ham aynan «Benfika»ga qarshi o‘yinda qayd etilgandi.
Ma’lumot uchun, Joze Mourino o‘z murabbiylik karerasini aynan «Benfika»da 2000-yilning sentyabridan dekabrigacha boshlagan. Keyinchalik u «Port-u», «Chelsi», «Inter», «Real Madrid», «Manchester Yunayted», «Tottenxem» va «Roma» kabi yirik jamoalarni boshqarib, katta tajriba to‘pladi.
Muxlislar esa «Benfika»ning yangi davri qanday kechishini va Mourino jamoani qay darajada olg‘a boshqarishini qiziqish bilan kutmoqda.
“Zamin”ni Telegramʻda oʻqing!
