Argentina futboli afsonasi, ayni paytda «Inter Mayami» sharafini himoya qilayotgan Lionel Messi klub bilan hamkorligini davom ettirishga yaqin turibdi. Bu haqda insayder Fabritsio Romano o‘zining ishonchli manbalariga tayanib xabar tarqatdi. Ma’lumotlarga ko‘ra, jamoa va futbolchi shartnoma shartlari borasida to‘liq kelishuvga erishgan va yaqin kunlarda hujjatlar rasman imzolanishi kutilmoqda.
Eslatib o‘tamiz, Messi «Inter Mayami» safida 2023-yildan buyon harakat qilmoqda. Bu vaqt mobaynida u klubning asosiy yulduziga aylandi va muxlislar orasida alohida mehr qozondi. Afsonaviy hujumchi jamoa libosida 75 ta uchrashuvda maydonga tushib, 62 ta gol muallifiga aylandi va 30 marta sheriklariga aniq pas berib, ularni gol urishga yordam berdi.
Futbol olamida 38 yoshni qarshi olgan Lionel Messi hanuz yuqori darajada o‘ynayotgani bilan e’tibor qozonmoqda. Uning hozirgi shartnomasi 2025-yil yakuniga qadar mo‘ljallangan bo‘lib, yangi kelishuv orqali u klubda yana bir necha mavsum qolishi mumkin.
«Inter Mayami»ning yangi shartnomani taklif etishi bejiz emas. Chunki Messi nafaqat jamoa o‘yinida hal qiluvchi rol o‘ynamoqda, balki klubning tijorat salohiyati, imidji va tomoshaboplik darajasini ham yuqori pog‘onaga ko‘tarib yubordi. Uning ishtirokida stadionlar to‘lib-toshmoqda, televideniye va internet orqali o‘yinlarni kuzatuvchilar soni rekord darajada oshmoqda.
Yangi shartnoma orqali Messi «Inter Mayami» bilan yanada uzoq muddatli tarix yozishi va AQSH futbolida yangi sahifalar ochishi mumkin. Muxlislar esa yaqin kunlarda ushbu kutilgan xabar rasman e’lon qilinishini intizorlik bilan kutishmoqda.
“Zamin”ni Telegramʻda oʻqing!
