«Manchester Siti»ning bosh murabbiyi Xosep Gvardiola O‘zbekiston terma jamoasi a’zosi Abduqodir Husanovning jamoaga moslashishi va o‘yin darajasini juda yuqori baholadi. Gvardiola Husanovning ko‘plab pozitsiyalarda ishonchli o‘yin ko‘rsatayotganini, jismoniy kuchliligini va ko‘rish qobiliyatini maxsus ta’kidladi.
"Husanov markazda ham, himoya chizig‘ining deyarli barcha pozitsiyalarida o‘ynay oladi, faqat chap qanotdan tashqari. Uning ko‘rish qobiliyati ajoyib, ishonchli, barqaror, jismoniy jihatdan kuchli — xuddi Kayl Uoker o‘zining eng yaxshi davrida bo‘lgani kabi. Diqqat-e’tibori zo‘r, o‘rganishga chanqoq. Abduqodir juda-juda yaxshi o‘yin ko‘rsatmoqda", — dedi Gvardiola.
Gvardiola o‘z so‘zlarida Husanovning yoshi, O‘zbekistondan Fransiya orqali «Manchester Siti»ga kelish jarayonini ham ta’kidladi. "U juda yosh. O‘zbekistondan Fransiyaga, keyin bu yerga kelib, biz uchun qiyin mavsumda moslasha oldi. Bizning o‘yin tizimimizni tez o‘zlashtirdi va u yana ko‘proq narsani o‘rganishi shubhasiz. Ha, siz tushunasizki, u kelgusi yillar davomida klub uchun eng yaxshi transfer bo‘ladi", — deya Gvardiola Husanovning kelajagiga ishonch bildirdi.
Abduqodir Husanovning muvaffaqiyatlari «Manchester Siti»ning himoyasini yanada mustahkamlashga va klubdagi istiqbolli o‘yinchilardan biriga aylanishiga ishora qiladi. Gvardiola tomonidan aytilayotgan bu baho, Husanovning kelajagi haqidagi yaxshi prognozlarni yanada mustahkamlaydi.
“Zamin”ni Telegramʻda oʻqing!
