Krishtianu Ronaldu yetakchiligidagi “An-Nasr” Saudiya Arabistoni Professional ligasida o‘zining ketma-ket to‘rtinchi g‘alabasini nishonladi. Bu gal riyodliklar Jiddaning “Al-Ittihod” klubini 2:0 hisobida mag‘lub etdi va muxlislarini yana bir bor quvonchga sherik qildi.
Bellashuvdagi g‘alaba uchun muhim gollarni ikki mashhur yulduz – Sadio Mane va Krishtianu Ronaldu kiritishdi. Mazkur natija nafaqat jamoa uchun, balki Ronalduning shaxsiy karerasi uchun ham katta ahamiyat kasb etdi. Chunki 40 yoshli hujumchi yangi tarixiy ko‘rsatkichga erishib, rasmiy uchrashuvlarda urgan gollari sonini 946 taga yetkazdi. Bu natija uning oldindan o‘ziga tegishli bo‘lgan rekordini yanada mustahkamladi.
Portugaliyalik super yulduz uchrashuvdan so‘ng Instagram ijtimoiy tarmog‘ida o‘z fikrini bildirib, muxlislarga shunday deb murojaat qildi:
— Bu “An-Nasr”! Mana biz kimmiz.
Eslatib o‘tamiz, Krishtianu Ronalduning “An-Nasr” bilan shartnomasi 2027-yilning yozigacha amal qiladi. Muxlislar va ekspertlar esa hozirdan uning gollari sonini 1000 taga yetkaza olish-olmasligi haqida qizg‘in muhokamalarni olib borishmoqda. Uning joriy formasi va g‘alabaga bo‘lgan chanqoqligi e’tiborga olinsa, bu imkoniyat yo‘q emas.
“Zamin”ni Telegramʻda oʻqing!
