Xalqaro futbol federatsiyasi (FIFA) kelasi mavsumdan boshlab penalti tepish tartibi bo‘yicha muhim o‘zgarishlarni amalga oshirishni rejalashtirayotgani ma’lum bo‘ldi. Bu haqda Germaniyaning nufuzli nashri "Bild" xabar tarqatdi. Yangi taklif qilingan qoida futbol dunyosini jiddiy muhokamalarga chorlamoqda.
Ma’lumotlarga ko‘ra, agar futbolchi penalti zarbasini amalga oshirsa va darvozabon uni qaytarsa, hujumchi ikkinchi urinish orqali to‘pni darvozaga yo‘llay olmaydi. Yangi tartibga ko‘ra, bu holatda o‘yin davom etmaydi, balki darvozabon to‘pni erkin zarba orqali o‘yinga kiritish huquqiga ega bo‘ladi.
Shu bilan birga, penalti zarbasi ustunga yoki to‘singa tegib qaytgan vaziyatlarda nima qilinishi haqida hozircha aniq ma’lumot berilmadi. Bu jihat hozircha ochiq masala bo‘lib qolmoqda va qo‘shimcha muhokamalar talab etadi.
Yangi tartib kuchga kirishi uchun Futbol assotsiatsiyalari xalqaro kengashi (IFAB) tomonidan rasman tasdiqlanishi shart. Agar qaror qabul qilinsa, avval turli musobaqalarda sinovdan o‘tkaziladi va to‘liq amalga joriy etilishi 2026/2027 yilgi mavsumdan boshlanadi.
Shu bilan birga, 2026-yilning 11-iyunidan 19-iyuliga qadar AQSH, Kanada va Meksika hududlarida bo‘lib o‘tadigan jahon chempionatida ushbu qoida amal qilmasligi aniq. Chunki katta turnirda eksperimental o‘zgarishlar joriy etish rejalashtirilmagan.
Futbol ekspertlari va muxlislari bu taklifga turlicha munosabat bildirishmoqda. Ayrimlar bu tartib hujumchilar uchun imkoniyatlarni cheklaydi, deb hisoblasa, boshqalar darvozabonlar nufuzini oshirish va ularning roli yanada muhimlashishiga ishonadi.
Shubhasiz, agar qoida qabul qilinsa, futbol dunyosida penalti ijrosi tarixida yangi davr boshlanishi mumkin.
“Zamin”ni Telegramʻda oʻqing!
