O‘zbekiston milliy jamoasi bosh murabbiyi lavozimi uchun kurash tobora qizg‘in tus olmoqda. Yaqinda italiyalik Fabio Kannavaro nomzodi tilga olingan bo‘lsa, endi yana bir nufuzli mutaxassisning ismi jamoatchilikka ma’lum bo‘ldi. Eronning Varzesh sayti Sport3ga tayanib xabar berishicha, xorvatiyalik tajribali murabbiy Branko Ivankovich Jahon chempionati-2026 arafasida O‘zbekiston milliy termasiga taklif etilgan.
Rasmiy taklif haqida ma’lumot
Ivankovichning Erondagi uzoq yillik sherigi va tarjimoni Rizo Chilongar bu xabarni tasdiqladi:
«O‘zbekistonliklar Brankoga rasmiy taklif yo‘llashdi. Ular JCH-2026 oldidan yangi bosh murabbiy izlamoqda va u bilan muzokaralarni boshlab yuborishdi», — dedi manba.
Bu ma’lumot o‘z-o‘zidan O‘zbekiston Futbol Assotsiatsiyasi jamoani mundialga munosib tayyorlay oladigan xalqaro tajribali murabbiy qidirayotganidan dalolat.
Ivankovichning murabbiylik yo‘li
71 yoshli xorvat mutaxassisning murabbiylik karerasi juda boy. U Xitoy milliy jamoasi bilan JCH-2026 yo‘llanmasini qo‘lga kirita olmagani uchun lavozimidan ozod etilgandi.
Shuningdek, 2020–2024-yillarda u O‘mon milliy jamoasini boshqardi va jamoani qator nufuzli turnirlarda maydonga olib chiqdi.
Bundan avvalroq, 2006-yilda Ivankovich Eron milliy jamoasini Jahon chempionatiga olib borgan, ammo guruh bosqichidan chiqishga erishmagan. U shu bilan birga Eron olimpiya termasi, mashhur «Persepolis» klubi hamda Saudiya, Xitoy va Xorvatiya klublarida ham faoliyat yuritgan.
Jahon chempionatidagi tajriba
Ivankovich ikki bor mundialda qatnashish sharafiga ega bo‘lgan. 1998-yilda Xorvatiya milliy jamoasi yordamchi murabbiyi sifatida terma jamoa bilan Fransiyaga yo‘l olgan. 2006-yilda esa Eronning bosh murabbiyi sifatida Germaniyada o‘tgan mundialda ishtirok etgan.
Bu tajribalar uning xalqaro musobaqalarda ishlay olish salohiyati yuqori ekanligini ko‘rsatadi.
O‘zbekiston uchun yangi sinov
Ma’lumki, O‘zbekiston milliy jamoasi o‘z tarixida ilk bor JCH-2026 yo‘llanmasini qo‘lga kiritgan. Shu bois Assotsiatsiya jamoani global turnirga munosib holatda tayyorlaydigan tajribali va nufuzli murabbiy bilan kelishishni maqsad qilgan.
Agar muzokaralar ijobiy yakunlansa, Ivankovich o‘zining Osiyo futbolidagi ulkan tajribasini O‘zbekiston uchun ishga solishi mumkin.
“Zamin”ni Telegramʻda oʻqing!
