Londonning mashhur klubi “Chelsi”da so‘nggi haftalarda vaziyat yana keskinlashdi. Football Insider xabariga ko‘ra, jamoa bosh murabbiyi Enso Mareskaning kelajagi katta savol ostida turibdi. Italiyalik mutaxassisning lavozimini tark etishi ehtimoli ortib borayotgani aytilmoqda.
Manbalarning ma’lum qilishicha, Turinning “Yuventus” klubi Mareskaning holatini diqqat bilan kuzatmoqda. Agar u “Chelsi”ni tark etsa, Italiya klubi uni o‘z safida ko‘rishni xohlashi mumkin.
Eslatib o‘tamiz, Enso Mareska o‘tgan mavsumda “ko‘klar”ni Chempionlar ligasiga olib chiqqan va Yevropa konferensiyalar ligasida jamoani g‘alabaga yetaklagandi. Shuningdek, yozgi musobaqalarda “Chelsi” Klublar o‘rtasidagi jahon chempionatida ham zafar quchgan edi.
Biroq joriy mavsum boshlanishi murabbiy uchun murakkab kechmoqda. “Manchester Yunayted” va “Brayton”ga qarshi mag‘lubiyatlardan so‘ng jamoa muxlislari va matbuot bosimi keskin oshdi. Har qancha “Benfika” va “Liverpul” ustidan qo‘shilgan g‘alabalar vaziyatni biroz yumshatgan bo‘lsa-da, Mareska hali ham iste’fo arafasidagi asosiy nomzodlardan biri sifatida tilga olinmoqda.
Bundan tashqari, klub ichidagi boshqa muammolar ham bor — yarim himoyachi Enso Fernandesga “Real Madrid”ning jiddiy qiziqishi “Stemford Brij”dagi beqarorlikni yanada oshirdi.
Xabarlarga ko‘ra, agar “Chelsi” yaqin turda “Nottingem Forest” ustidan g‘alaba qozona olmasa, Enso Mareskaning kelajagi klubda yanada xavf ostida qolishi mumkin.
Ayni paytda “Chelsi” APL jadvalida 7 turdan so‘ng 11 ochko bilan 7-o‘rinni egallab turibdi. Bu natija “ko‘klar” darajasi uchun past hisoblanadi va rahbariyat tez orada qat’iy qaror qabul qilishi ehtimoldan xoli emas.
Tahlilchilar fikricha, agar Mareska yaqin haftalarda vaziyatni yaxshilay olmasa, “Chelsi”da navbatdagi murabbiy almashinuvi muqarrar bo‘ladi.
“Zamin”ni Telegramʻda oʻqing!
