“Manchester Yunayted” bosh murabbiyi Ruben Amorim Angliya Premer-ligasida so‘nggi yillarda misli ko‘rilmagan natija qayd etdi.
Portugaliyalik mutaxassis jamoasi bilan bir vaqtning o‘zida ikki asosiy raqibni — “Liverpul”ni va “Manchester Siti”ni ularning maydonida mag‘lub etgan yagona murabbiyga aylandi.
Yakshanba kuni APLning 8-turida “Yunayted” mehmon sifatida “Enfild”da “Liverpul”ni 2:1 hisobida yengdi. Bu g‘alaba jamoaga muhim ochkolarni olib keldi va Amorimning murabbiylik faoliyatida yana bir yorqin sahifa ochdi.
Eslatib o‘tish joiz, o‘tgan mavsumda ham “qizil iblislar” 15-dekabr kuni “Etixad”da “Manchester Siti” ustidan 2:1 hisobida zafar quchgan edi.
Shu tariqa, Ruben Amorim so‘nggi besh mavsum ichida bir vaqtning o‘zida “Enfild” va “Etixad”da g‘alaba qozona olgan yagona Premer-liga murabbiyi sifatida tarixga kirdi.
Futbol muxlislari bu natijani Premer-liga uchun noyob voqea deb baholamoqda. Chunki so‘nggi yillarda bu ikki stadionda mehmon jamoalar uchun g‘alaba qozonish juda murakkab bo‘lgan.
Amorimning strategiyasi va jamoa intizomi “Yunayted”ga kuchli raqiblar oldida ham o‘z o‘yinini ko‘rsata olish imkonini bermoqda. Murabbiyning bu yutug‘i nafaqat uning professionalligi, balki “Yunayted”ning qayta tiklanayotgan kuchini ham namoyon qildi.
“Zamin”ni Telegramʻda oʻqing!
