«Inter Mayami» yetakchisi va jahon futboli afsonasi Leonel Messi klub bilan shartnomasini uzaytirganidan keyin o‘z fikrlarini bildirib o‘tdi. Uning so‘zlariga ko‘ra, Mayamidagi hayot unga kutilganidan ham ko‘proq zavq bag‘ishlagan va yangi loyihalarda ishtirok etish unga ilhom bermoqda, deb xabar berdi intermiamicf.com.
«Bu jamoa bilan yo‘limni davom ettirayotganimdan juda mamnunman. "Inter Mayami" faqat klub emas — bu men uchun ikkinchi uy bo‘lib qoldi. Birinchi kunlardanoq bu shaharda o‘zimni tinch, erkin va hurmatga sazovor his qildim. Shu muhitda, shunday odamlar orasida bo‘lish menga katta kuch va motivatsiya beradi», — dedi Messi.
Messi ayniqsa klubning yangi stadioni — «Mayami Fridom Park» haqida to‘xtalib, bu loyihani o‘zining futbol orzulari bilan bog‘ladi. «Yangi stadionda o‘ynash — faqat xayol emas, endi bu orzu hayotga aylanyapti. Bu jamoa, bu shahar va muxlislar buni haqiqatdan ham munosib ko‘rishadi. Biz yangi uyimizdagi ilk bahsni sabrsizlik bilan kutayapmiz. Ham men, ham jamoadoshlarim muxlislar bilan bu muhitni his qilishni intizorlik bilan kutayotganimiz rost», — dedi u.
Leonel Messi so‘zlariga ko‘ra, yangi arena faqat o‘yin maydoni emas, balki butun jamoa uchun yangi davrning ramziga aylanadi. «Bu stadion bizning mehnatimiz va ishonchimizning samarasi bo‘ladi. Bu yerda o‘ynash nafaqat futbolchi, balki inson sifatida ham g‘urur tuyg‘usini uyg‘otadi», — deb qo‘shimcha qildi argentinalik yulduz.
Messi shuningdek, klubdagi muhit, hamjixatlik va ambitsiyalar haqida ham to‘xtalib o‘tdi. «Jamoadagi barcha — rahbariyatdan tortib yosh futbolchilargacha — yagona maqsad atrofida birlashgan. Biz yangi bosqichga chiqishni, Amerika futbolida yangi sahifa ochishni niyat qilganmiz. Bu yo‘ldagi har bir qadam men uchun muhim. Shu sabab ham shartnomamni uzaytirish haqida ikkilanmadim», — dedi u.
Messi so‘zlarining oxirida muxlislarga ham minnatdorlik izhor etdi. «Mayami muxlislari bizga ilk kunlardanoq samimiy muhabbat bilan yondoshishdi. Ular bilan har bir o‘yinda bir tan-u bir jon bo‘lib maydonga chiqamiz. Endi yangi stadionda ularni yanada kattaroq xursand qilish vaqti keldi», — dedi Messi.
Uning bu gaplari klub va muxlislar orasida katta ijobiy kayfiyat uyg‘otdi. Chunki Messi uchun «Inter Mayami» endi faqat Amerikadagi yangi manzil emas — u yerdagi har bir o‘yin uning futbol yo‘lidagi yangi sahifa, yangi ilhom manbai hisoblanadi.
“Zamin”ni Telegramʻda oʻqing!
