Ispaniya chempionatidagi asosiy raqobat “El-Klasiko” arafasida yana qiziy boshladi. Bu safar bahs maydonda emas, balki so‘z maydonida avj oldi.
Yaqinda “Barselona”ning yosh yulduzi Lamin Yamal “Kings League” strimida ishtirok etib, “Real Madrid” haqida bahsli gaplar aytgan edi. Unga bloger Ibay Lyanos “Senga ‘Porsinos’ jamoasi ‘Real Madrid’ni eslatmaydimi?” degan savol berganda, Yamal shunday javob berdi:
— Ha, albatta. Ular doim o‘g‘irlik qiladi va keyin shikoyat qiladi.
Bu so‘zlar, tabiiyki, “qirollik klubi” muhitida katta muhokamaga sabab bo‘ldi. Bugun esa “Real Madrid” bosh murabbiyi Xabi Alonso bu haqdagi savollarga javob berdi.
— Men bu masala yuzasidan batafsil izoh bermayman, — dedi u jurnalistlar bilan suhbatda. — “Barselona” vakillarining shuncha ko‘p bayonotlari borki, ularning barchasiga javob berishning iloji yo‘q. Biz diqqatimizni faqat o‘yinga qaratishni afzal ko‘ramiz.
Alonso shu bilan o‘z jamoasi atrofidagi ehtiyojsiz shov-shuvlardan chetda qolishni xohlayotganini ko‘rsatdi. Uning fikricha, “El-Klasiko”da har qanday so‘z emas, faqat o‘yin va natija ahamiyatli bo‘ladi.
Eslatib o‘tamiz, “Real Madrid” va “Barselona” o‘rtasidagi jahon futbolining eng kutilgan bahsi 26-oktyabr kuni soat 20:15 da “Santyago Bernabeu”da bo‘lib o‘tadi. Bu uchrashuvda ikkala klub ham chempionlik yo‘lida muhim ochkolar uchun maydonga tushadi.
“Zamin”ni Telegramʻda oʻqing!
