«Al Nassr» sardori, portugaliyalik afsona Krishtianu Ronaldu 40 yoshda bo‘lishiga qaramay, hali ham yuqori jismoniy holatda o‘ynayotganini barchaga isbotlab kelmoqda. Uning faoliyati, intizomi va shaxsiy turmush tarzi ko‘plab yosh sportchilar uchun namuna bo‘lib xizmat qilmoqda.
Yaqinda Ronaldu matbuotga bergan suhbatda o‘zining salohiyatini uzoq yillar saqlab turish sirlaridan biri haqida gapirdi. Uning so‘zlariga ko‘ra, barqaror uyqu tartibi sog‘lom hayot va yuqori natijaning asosiy omillaridan biri hisoblanadi.
«Men uchun uyqu — eng muhim narsa. Har kecha soat 23:00 yoki 24:00 larda uxlayman va ertalab 8:30da uyg‘onaman. Bu mening kun tartibimning o‘zgarmas qismi. Yaxshi uyqu nafaqat tiklanish, balki uzoq umr ko‘rish va doim yaxshi sport formasida bo‘lish uchun ham kalitdir», — dedi Ronaldu.
Futbol yulduzi ta’kidlashicha, inson tanasiga yetti-sakkiz soat uyqu yetarli bo‘lishi kerak va uning to‘liq qiymatini anglash har qanday kasb va sport turi uchun muhim. «Kunlik mashg‘ulotlar, diyeta va tiklanish jarayoni uyqusiz samara bermaydi», — deya qo‘shimcha qildi u.
Eslatib o‘tamiz, kecha bo‘lib o‘tgan Saudiya Proligasi uchrashuvida Krishtianu Ronaldu faoliyatidagi 950-golini urdi. Bu ko‘rsatkich uni futbol tarixidagi eng samarali to‘purarlardan biri sifatida yanada mustahkamlaydi.
Murabbiylar va sport mutaxassislari ham Ronalduning jismoniy holatini saqlab qolishdagi intizomini yuqori baholashadi. U nafaqat mashg‘ulotlarda, balki kundalik turmushda ham har bir detalga e’tibor qaratgan holda harakat qiladi.
Krishtianu Ronalduning so‘zlari, shubhasiz, yosh avlodga muhim saboq: katta natijalar faqat mehnat, intizom va sog‘lom hayot tarzi orqali qo‘lga kiritiladi.
“Zamin”ni Telegramʻda oʻqing!
