Bahrayn poytaxti Manama shahrida o‘tkazilayotgan III Yoshlar Osiyo o‘yinlarining boks bo‘yicha musobaqalari final bosqichiga yetdi va bu kun o‘zbekistonlik boks muxlislari uchun esda qolarli voqeaga aylandi.
Bugun ringga chiqqan hamyurtlarimiz shon-sharafli natijalarga erishdi. Kunning birinchi dasturida ishtirok etgan Abdug‘ani Yorqinjonov raqiblarini ortda qoldirib, Osiyo chempioni unvoniga sazovor bo‘ldi va oltin medal sohibi bo‘ldi. Shu bilan birga, Qumriniso Muhammadova kurashda ikkinchi o‘rinni egallab, kumush medalni qo‘lga kiritdi.
Ikkinchi dasturda yana olti nafar charm qo‘lqop ustamiz final janglariga chiqishdi. Ular ham yurt sharafini munosib himoya qildi.
Rushanabonu Isoyeva (-60 kg) yaponiyalik raqibi Miki Miurani uchinchi raundda texnik nokaut bilan mag‘lub etdi va O‘zbekiston uchun navbatdagi oltinni taqdim etdi.
Ibrohim Shokirjonov ham (-60 kg) qirg‘iz bokschisi Zubair Akramovni 5:0 hisobida mag‘lub etdi.
Saidxo‘ja Sadillaxo‘jayev (-66 kg) finalda qozoqistonlik Daniyal Shalkarbayga imkoniyatni boy berdi va kumush medal bilan cheklandi.
Samira Turg‘unova (-75 kg) ham qozoqistonlik Kamila Ospanovaga 0:5 hisobida yutqazdi.
Diyorbek Murodilloyev (-75 kg) finalda eronlik Deyman Sherafatmandni 5:0 hisobida yengib, Osiyo chempioni bo‘ldi.
Asadbek Sultonboyev (+80 kg) esa qozoqistonlik Muhamedali Rustembekni 5:0 hisobida mag‘lub etdi.
Shunday qilib, bir kunda O‘zbekiston terma jamoasi yoshlar o‘rtasidagi Osiyo o‘yinlarida bir nechta oltin va kumush medallarni qo‘lga kiritdi. Bu natija mamlakatimiz uchun boksda yangi avlod — yangi tarix boshlanishi sifatida baholanmoqda.
O‘zbekiston boks federatsiyasi vakillarining ta’kidlashicha, ushbu g‘alabalar mamlakatda yosh bokschilar tayyorgarligini sifat jihatidan yangi bosqichga olib chiqadi.
Bahrayn ringlaridagi bu zafarlar O‘zbekiston sport tarixida yoshlar darajasidagi eng muvaffaqiyatli ishtiroklardan biri sifatida yodda qoladi.
“Zamin”ni Telegramʻda oʻqing!
