La Liganing 11-turida "Xetafe" oʻz uyida "Jirona"ni qabul qildi. Uchrashuvning 73-daqiqasigacha jamoalar oʻrtasida muhim vaziyatlar kuzatilmadi.
Ammo Luis Milyaning jarima maydoniga uzatgan toʻpi Mario Martin tomonidan bosh bilan darvozaga yoʻllanib, hisobni ochdi (1:0). Shundan soʻng oʻyin ochiq tus oldi.
Qarshi hujum chogʻida Vladislav Vanatning zarbasini "Xetafe" darvozaboni ajoyib tarzda qaytarishga muvaffaq boʻldi. Uchrashuv yakunlanib borar ekan, Aleks Sankrisning uzatmasidan soʻng Borxa Mayoraldan aniq zarba kuzatildi va hisob 2:0 boʻldi.
"Jirona" faqat oʻz sharaf goli bilan kifoyalandi: Vanat jarima maydonida qoʻpol toʻxtatildi va Kristian Stuani penaltini aniq amalga oshirdi (2:1). Ushbu gʻalaba "Xetafe"ni turnir jadvalida oltinchi oʻringa olib chiqdi, "Jirona" esa oxirgi oʻrinni boʻlishishda davom etmoqda.
