Futbol olami yana ikki buyuk yulduz — Krishtianu Ronaldu va Lionel Messi nomlarini muhokama qilmoqda. Bu ikki afsonaning o‘zaro raqobati orqali butun bir davr ta’riflandi desak, mubolag‘a bo‘lmaydi. Ular faoliyatlarining so‘nggi yillariga qadam qo‘ygan bo‘lsalar-da, hanuz jahon futboli sahnasining markazida turishibdi, deb xabar berdi ESPN.
Saudiya Arabistonidagi Pro-liga doirasida “Al-Nasr” klubi “Al-Feyha”ga qarshi bahsda 2:1 hisobida g‘alaba qozondi. Jamoa sardori va yetakchisi Krishtianu Ronaldu yana o‘z so‘zini aytdi — u dubl qayd etib, riyodliklarga muhim uch ochko taqdim etdi. Shu bilan portugaliyalik hujumchining faoliyati davomida urgan umumiy gollari soni 952 taga yetdi. Bu raqam futbol tarixida misli ko‘rilmagan daraja hisoblanadi.
40 yoshda bo‘lishiga qaramasdan, Ronaldu hanuz yuqori formada. Uning maydondagi harakatlari, harakatchanligi va ehtirosi yosh futbolchilarga namuna bo‘lib kelmoqda. Har bir golidan keyingi hissiyot, har bir g‘alabadagi xursandchiligi — uning futbolga bo‘lgan muhabbati hali ham kuchli ekanligini ko‘rsatadi.
Bu paytda okean ortida — AQSHda Lionel Messi boshchiligidagi “Inter Mayami” jamoasi MLS pley-off bosqichida omadsiz ishtirok etdi. Mayamiliklar “Neshvill” jamoasiga 1:2 hisobida mag‘lub bo‘ldi. Messining jamoa manfaati uchun urgan go‘zal goli natijani o‘zgartirishga yetarli bo‘lmadi.
Shu bilan argentinalik yulduzning shaxsiy statistikasidagi gollar soni 892 taga yetdi. Endi “Inter Mayami”ning keyingi bosqichga chiqish taqdiri 8-noyabrda bo‘ladigan hal qiluvchi uchinchi uchrashuvda ma’lum bo‘ladi.
Gollar soni bo‘yicha hozircha ustunlik Ronalduda bo‘lsa, assistlar jihatidan Messi yetakchilikni qo‘ldan bermayapti. Sakkiz karra “Oltin to‘p” sohibi bo‘lgan argentinalik hujumchi faoliyati davomida jamoadoshlariga 399 ta samarali pas uzatgan. Bu ko‘rsatkich uni dunyo futbolidagi eng mehnatkash va jamoaviy o‘yinchi sifatida tanitishga yetarli. Ronalduda esa 259 ta golli uzatma mavjud.
Ikki yulduzning raqobati faqat statistika bilan chegaralanmaydi — bu ikki shaxs futbol falsafasi, mehnat madaniyati va zamonaviy sportning ramziga aylangan. Ular maydonda turli uslubda o‘ynasa-da, har ikkalasi ham futbolning ma’naviy yuziga aylandi.
Hozir ham dunyodagi millionlab muxlislar har bir o‘yindan keyin “kim yaxshiroq?” degan savolga javob izlashda davom etmoqda. Ammo aniq bir jihat bor — Ronaldu va Messi raqobati butun bir avlodni ilhomlantirgan, futbol tarixiga abadiy bitilgan voqelikdir.
Bu raqobat endi faqat maydonda emas, balki tarix sahifalarida ham davom etmoqda. Ronalduning 952 goli va Messining 892 goli — ikki afsonaning o‘chmas izidir.
“Zamin”ni Telegramʻda oʻqing!
