Madridning “Real” klubi safida yetakchiga aylanib ulgurgan Kilian Mbappe o‘zining bugungacha urgan gollari orasida eng qimmatli deb hisoblaganini aniqladi. Fransiyalik yulduzning so‘zlariga ko‘ra, bu gol uning Madriddagi karerasida yangi sahifa ochgan.
“Men uchun odatda eng yodda qoladigan gol — eng so‘nggisi bo‘ladi. Lekin bu safar an’anani buzaman va birinchi golimni tanlayman. Ushbu golni “Santyago Bernabeu”da “Betis” darvozasiga urganman. O‘sha kun mening “Real”dagi yo‘limning boshlanishi bo‘lgani uchun u men uchun boshqacha ahamiyatga ega”, — dedi Mbappe Marca nashriga bergan intervyusida.
Mbappe 2024-yilning 1-sentyabr kuni bo‘lib o‘tgan La Liganing 4-turida “Betis”ga qarshi uchrashuvda ajoyib o‘yin ko‘rsatgan va jamoasiga 2:0 hisobidagi g‘alabani ta’minlagan. O‘shanda u nafaqat dubl qayd etgan, balki muxlislar oldidagi ilk yirik tantanasini nishonlagandi.
O‘yindan keyingi paytlarda Mbappe bu g‘alaba orqali “Real” muxlislarining qalbini zabt etganini aytgan. “O‘sha kunni hech qachon unuta olmayman. “Bernabeu”da gol urgan har bir daqiqa jonli tarix. Bu yerdagi muxlislar jonkuyar va sadoqatli, ular uchun o‘ynash katta mas’uliyat”, — deb qo‘shimcha qildi u.
Shu tariqa, fransiyalik hujumchi uchun “Betis”ga qarshi gol nafaqat hisobdagi yutuq, balki madridliklar safidagi yangi hayotning ramzi sifatida ahamiyat kasb etdi.
Bugungi kunda Mbappe “Real”ning asosiy yulduziga aylandi, u nafaqat maydondagi samarasi, balki yetakchilik fazilatlari bilan ham jamoa uchun muhim shaxs sifatida ko‘rilmoqda. Ko‘pchilik ekspertlar esa uning “Betis”ga qarshi o‘sha golini madridliklardagi “muhabbat boshlanishi” deb ta’riflamoqda.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
