Yevropa Chempionlar Ligasining 4-tur bahslari bugun davom etadi va muxlislar diqqati yana Angliya klublariga qaratiladi. Bu turda “Manchester Siti”, “Chelsi” va “Barselona” jamoalari maydonga tushishadi. Har uch jamoa uchun ham g‘alaba muhim ahamiyat kasb etadi, chunki har biri guruhdagi yetakchi pozitsiyani mustahkamlab olishni niyat qilgan.
Eng qiziqarli uchrashuvlardan biri “Manchester Siti” va Germaniyaning “Borussiya Dortmund” jamoasi o‘rtasida kechishi kutilmoqda. Angliya klubi bosh murabbiyi Pep Gvardiola ushbu bahsda o‘zbek legioneri Abduqodir Husanovni asosiy tarkibda maydonga tushirishni rejalashtirayotgani aytilmoqda. Bu himoyachi uchun Yevropa miqyosida o‘zini yana bir bor namoyon qilish imkoni bo‘ladi.
“Siti”ning ehtimoliy tarkibi: Donnarumma, Gvardiol, Stounz, Diash, Nunes, Lyuis, Silva, Niko, Savinio, Dok-u va Holand.
“Borussiya Dortmund” tarkibi: Kobel, Anton, Shlotterbek, Bensebaini, Svensson, Nmecha, Bellinghem, Brandt, Bayer, Kouto, Girassi.
Shuningdek, bugun Yevropa futboli muxlislarini yana ikki yirik to‘qnashuv kutmoqda.
Belgiyaning “Bryugge” klubi “Barselona”ni qabul qiladi. Ispan grandi bu o‘yinda ham g‘alaba uchun kurashni davom ettiradi. “Barselona”ning ehtimoliy tarkibida Balde, Kubarsi, Kunde, De Yong, Yamal va Ferran Torres kabi yosh va tajribali futbolchilarni ko‘rish mumkin.
Bu kecha Londonning “Chelsi”si ham Ozarbayjonda “Qorabog‘”ga qarshi o‘yin olib boradi. Mareska shogirdlari uchun bu uchrashuv jamoa kayfiyatini tiklash imkoni bo‘ladi.
“Chelsi”ning ehtimoliy tarkibi: Sanches, Gusto, Acheampong, Adabarioyo, Kukurelya, Lavia, Kaysedo, Neto, Fernandes, Gittens va Giu.
Bugungi tur nafaqat natijalar, balki yosh yulduzlar va yangi yuzlarning namoyon bo‘lishi bilan ham yodda qolishi mumkin. Barcha nazarlar Gvardiola va uning shogirdlariga, jumladan, o‘zbekistonlik himoyachi Abduqodir Husanovga qaratilgan.
“Zamin”ni Telegramʻda oʻqing!
